Փետրվարի 8-ի կեսօրին Միլանում անցկացված ձմեռային Օլիմպիական խաղերի դեմ բողոքի երթն սկզբում կրել է խաղաղ բնույթ, սակայն գիշերը վերածվել է ոստիկանության հետ բախումների, գրում է CNN-ը։
Ցույցի ընթացքում մի խումբ ցուցարարներ թիրախավորել են իրավապահների ավտոմեքենաները, ինչին ի պատասխան՝ կիրառվել են արցունքաբեր գազ և ջրցան մեքենաներ։
Ցույցը կազմակերպել էր Unsustainable Olympics Committee ակտիվիստական նախաձեռնությունը, որը միավորել էր Միլանից, Լոմբարդիայից և Իտալիայի հյուսիսային այլ շրջաններից ժամանած տարբեր խմբերի։ Ցուցարարները հանդես էին գալիս Օլիմպիական խաղերի ենթակառուցվածքների կառուցման բնապահպանական հետևանքների, ինչպես նաև խաղերի «տնտեսական և սոցիալական վնասների» դեմ։
Բողոքի ակցիային մասնակցել են մարզական խմբեր, քաղաքացիական և բնապահպանական շարժումներ, ուսանողներ, արհմիություններ, պաղեստինամետ ցանցեր և տրանսֆեմինիստական կոլեկտիվներ։ Նրանք Իտալիայի կառավարությանը մեղադրել են անվտանգության քաղաքականության «ավտորիտար շեղման» մեջ։
Միջադեպերը տեղի են ունեցել այն պայմաններում, երբ իշխանություններն առանձին վարույթով ուսումնասիրում են Իտալիայի հյուսիսում երկաթուղային գծերի վրա գրանցված մի շարք միջադեպեր, որոնք, պաշտոնյաների մտահոգությամբ, կարող են ունենալ համակարգված սաբոտաժի բնույթ։
Ձմեռային Օլիմպիական խաղեր 2026-ը պաշտոնապես մեկնարկել էր փետրվարի 7-ին՝ Միլանի «Սան Սիրո» մարզադաշտում անցկացված բացման արարողությամբ։ Միջոցառմանը մասնակցել էին իտալացի տենոր Անդրեա Բոչելին ու ամերիկացի երգչուհի Մրայա Քերին։
