ԱՄՆ-ում, Մեքսիկայում և Կանադայում հունիսի 11-ին մեկնարկում է ֆուտբոլի 23-րդ աշխարհի առաջնությունը, որն առաջին անգամ կանցկացվի ընդլայնված ձևաչափով՝ 48 հավաքականների մասնակցությամբ, և կտևի ռեկորդային 39 օր, հայտնել է РБК-ն:
Մրցաշարի ընդհանուր 104 հանդիպումները կհյուրընկալեն 16 քաղաքներ, ընդ որում՝ խաղերի հիմնական մասը (78-ը, ներառյալ՝ քառորդ եզրափակիչից սկսած բոլոր հանդիպումները) կայանալու է ԱՄՆ-ում, իսկ Մեքսիկան ու Կանադան կընդունեն 13-ական հանդիպում: Մեխիկոյի «Ացտեկա» մարզադաշտում կայանալիք Մեքսիկա-Հարավաֆրիկյան հանրապետություն բացման խաղի ֆոնին սպասվում են Կրթության աշխատողների ազգային համակարգող խորհրդի (CNTE) բազմահազարանոց բողոքի ակցիաները, որոնք պահանջում են աշխատավարձերի 100% բարձրացում և սպառնում են տապալել բացման արարողությունն ու մրցաշարի պաշտոնական հիմնի կատարումը, թեև Մեքսիկայի նախագահ Կլաուդիա Շեյնբաումը վստահեցրել է, որ միջոցառումը կանցնի խաղաղ պայմաններում։
Այս առաջնությունը, ամենայն հավանականությամբ, վերջինը կլինի լեգենդար ֆուտբոլիստներ Լիոնել Մեսսիի և Կրիշտիանու Ռոնալդուի համար, իսկ Կենտրոնական Ասիան պատմության մեջ առաջին անգամ կունենա իր ներկայացուցիչը՝ ի դեմս Ուզբեկստանի հավաքականի, որը հանդես կգա K խմբում և կմրցի Պորտուգալիայի, Կոլումբիայի ու Կոնգոյի Դեմոկրատական Հանրապետության հետ։
Opta սուպերհամակարգչի 10 հազար սիմուլյացիաների արդյունքներով՝ առաջնության գլխավոր ֆավորիտ է համարվում Եվրոպայի գործող չեմպիոն Իսպանիան (15,59% հավանականություն), որին հաջորդում են Ֆրանսիան (12,75%) և Անգլիան (10,58%), իսկ «մահվան խումբ» է ճանաչվել I քվարտետը՝ Ֆրանսիայի, Սենեգալի, Նորվեգիայի (Էրլինգ Հոլանդի մասնակցությամբ) և Իրաքի կազմով։
Ֆինանսական տեսանկյունից մրցաշարի յուրաքանչյուր մասնակից կվաստակի առնվազն 12,5 մլն դոլար, իսկ ապագա չեմպիոնին բաժին կհասնի ռեկորդային 53,5 մլն դոլար։ Կադրային հարթությունում ամենաբարձր վարձատրվող մարզիչն է դարձել Բրազիլիայի ընտրանին գլխավորած իտալացի մասնագետ Կառլո Անչելոտտին (9,5 մլն եվրո տարեկան)։ Մրցաշարի ամենաթանկարժեք ֆուտբոլիստների տիտղոսը կիսում են նորվեգացի Էրլինգ Հոլանդն ու իսպանացի Լամին Յամալը, որոնցից յուրաքանչյուրի տրանսֆերային արժեքը Transfermarkt-ը գնահատում է 200 մլն եվրո, իսկ ամենաթանկարժեք խաղացողների առաջատար հնգյակում են նաև Կիլիան Մբապեն (180 մլն եվրո), Պեդրին (150 մլն եվրո) և Մայքլ Օլիսեն (150 մլն եվրո):
Հայաստանի հավաքականը չկարողացավ հայտնվել ֆուտբոլի աշխարհի առաջնության եզրափակիչ փուլում, սակայն քառամյակի գլխավոր ֆուտբոլային իրադարձությանը ներկայացված կլինի նաև հայկական առաջնության մասնակից։ Պատմության մեջ առաջին անգամ Հայաստանի Պրեմիեր լիգայի ֆուտբոլիստը կխաղա աշխարհի առաջնությունում. Երևանի «Նոա» ակումբի դարպասապահ Տիմոտի Ֆայուլուն մրցաշարում հանդես կգա Կոնգոյի ԴՀ (Դեմոկրատական Հանրապետության) հավաքականի կազմում։
