«Ջերմուկ 2026» միջազգային համաժողովի շրջանակում Սամվել Կարապետյանի առաջնորդած «Ուժեղ Հայաստան» կուսակցությունը մարտի 25-ին ստորագրել է հուշագրեր հոլանդական Dyami Security Intelligence և հունական DRCS անվտանգային բնույթի ընկերությունների հետ։ Համաժողովն ուղիղ հեռարձակվել է Armenia Today-ի Youtube-ի ալիքում։
«Ուժեղ Հայաստան» կուսակցության խորհրդի անդամ Նարեկ Կարապետյանը հայտնել է, որ Ջերմուկում անցկացվող անվտանգության համաժողովը խորհրդանշական է, քանի որ քաղաքից մի քանի կիլոմետր հեռավորության վրա գտնվում են օտարերկրյա զինված ուժեր, ինչը, նրա խոսքով, ցույց է տալիս Հայաստանի առջև կանգնած անվտանգային մարտահրավերների լրջությունը։
Կարապետյանն այս մարտահրավերների տեսանկյունից հուշագրերը կարևոր քայլ է համարել երկրի համար։ Նրա դիտարկմամբ՝ այս համագործակցությունը կօգնի ունենալ ժամանակակից անվտանգային համակարգեր և լավ պատրաստված բանակ։
Նա նշել է, որ հոլանդական ընկերությունը զբաղվում է տարբեր երկրների հատուկ նշանակության ստորաբաժանումների վերապատրաստմամբ։ Հունական ընկերությունը, «Ուժեղ Հայաստանի» անդամի խոսքով, մասնագիտացած է մարտական տարբեր զինատեսակներ կիրառող զինծառայողների պատրաստման մեջ։
«Բոլորը գիտեն, թե ինչպես խոսել անվտանգության մասին, բայց խոսելը բավարար չէ։ Անհրաժեշտ է, որ այն ուժը, որը ներկայացնում է անվտանգության տեսլական, ունենա այդ տեսլականն իրականություն դարձնելու հնարավորություն։ Դրա համար պետք են կապեր և բանակցային հմտություններ, որոնց առկայությունը կամ բացակայությունը որոշիչ դեր է ունենում յուրաքանչյուր երկրի անվտանգության ապահովման հարցում»,- հավելել է Կարապետյանը։
Նրա խոսքով՝ ներկայիս փոփոխվող աշխարհում անվտանգային նախկին մեխանիզմներն այլևս չեն աշխատում, և Հայաստանը պետք է լուրջ աշխատանք տանի իր տեղը գտնելու այդ համակարգերում։
«Միջազգային անվտանգության համակարգն աշխարհում խորը վերափոխումների է ենթարկվում, երկրորդ համաշխարհայինից հետո եկած աշխարհն այլևս չկա, նոր համակարգերը դեռ չեն ձևավորվել: Այս ժամանակաշրջանում շատ կարևոր է ունենալ և՛ պաշտպանական պոտենցիալ, և՛ դիվանագիտական, որպեսզի հնարավորություն ունենանք դիմակայել և տեղ ունենալ արևի տակ: Մոտակա 10 տարին է որոշելու, թե որ երկիրը ու որ ազգը տեղ կունենա արևի տակ»,- հայտարարել է նա։
Կարապետյանը վստահեցրել է՝ «Ուժեղ խաղաղություն» անվտանգային ծրագրերով, դիվանագիտական մոտեցմամբ և հայ ազգի ամբողջ պոտենցիալը համախմբելով՝ Կարապետյանի առաջնորդությամբ Հայաստանն «ունենալու է տեղ արևի տակ»:
«Ուժեղ Հայաստան» կուսակցության «Ուժեղ խաղաղություն» ծրագիրը ներկայացվել էր մարտի 18-ին, այն բաղկացած է վեց կետից։ Ծրագիրը ներառում է ուժեղ դիվանագիտություն, բանակի վերափոխում, պաշտպանված երկինք, խելացի սահմաններ, արժանապատիվ զինծառայություն և տեղական ռազմարդյունաբերության զարգացում:
