Այսօրվա դրությամբ Արցախից բռնի տեղահանված 900 ընտանիք ստացել է բնակարան ձեռք բերելու սերտիֆիկատ, նրանցից 100-ն է իրացրել սերտիֆիկատը, մնացածները որոշումների մեջ են, Հանրային հեռսուստաընկերության եթերում հայտնել է ՀՀ փոխվարչապետ Տիգրան Խաչատրյանը։ Խաչատրյանը մանրամասնել է, որ ընդհանուր առմամբ 3800 անձ ստացել է սերտիֆիկատ։
Անդրադառնալով այն դիտարկմանը, որ արցախցիները բնակարապահովման ծրագրին չեն դիմում, քանի որ առաջարկվող գումարը քիչ է, փոխվարչապետը նշել է, որ բնակարանային աջակցության ծրագրով առաջարկվող միջոցները բավարար են։
Նա հիշեցրել է, որ ծրագրի փոփոխություններով ընդլայնվել է այն բնակավայրերի ցանկը, որտեղ բնակարան ձեռք բերելու համար ընտանիքի յուրաքանչյուր անդամի հատկացվելու է 4 մլն դրամ։
Նա համոզմունք է հայտնել, որ 3 հոգանոց ընտանիքը կարող է Վանաձորում կամ Արմավիրում 12 մլն դրամով բնակարան ձեռք բերել։
«Մենք բնակարակային ապահովության ծրագրի շահառուներին որոշելու որոշակի հերթականություն ենք սահմանել։ 5 հոգանոց ընտանիքի համար բավարար է»,- ասել է նա։
Ըստ նրա՝ բնակարանային վարձի աջակցության ծրագիրը խանգարում էր երկարաժամկետ աջակցության ծրագիրն իրականացնելու հարցում։
«2024թվականին կայացրինք որոշում, որով ասել էինք, որ 2025 թվականի ապրիլից աջակցությունը կնվազի։ Այն չի գործի աշխատանքային տարիքի մարդկանց համար, կգործի երեխաների, կենսաթոշակային տարիքի անձանց, հաշմանդամություն ունեցող և կերակրողին կորցրած ընտանիքների համար»,- ասել է նա։
Խաչատրյանի խոսքով՝ խոցելի ընտանիքները մինչև տարեվերջ կմնան ծրագրի շահառու։
«Որպեսզի մարդիկ վերագնահատեն աջակցության ժամանակավորությունը և մտածեն բնակարային աջակցության ծրագրից օգտվելու մասին»,- հավելել է նա։
Փոխվարչապետը հիշեցրել է, որ կառավարությունը խոցելի 3000 ընտանիքների համար մշակել է աջակցության ծրագիր, որով 4 հոգանոց ընտանիքը ամսական կստանա 70 հազար դրամ։
Նա նշել է, որ ( 120 000 բռնի տեղահանվածներից- խմբ) 22 000 արցախցի աշխատանք ունի, 4500-ը՝ ինքնազբաղված է։
Խաչատրյանը հավելել է, որ աջակցությունն անժամկետ չի կարող լինել և ձևաչափերը պիտի փոխվեն։
Նրա տվյալներով՝ 2023-ի հոկտեմբերից Արցախից տեղահանվածներին աջակցության տարբեր ծրագրերով հատկացվել է ավելի քան 115 մլրդ դրամ, որի մոտ 90 տոկոսը ծախսվել են կառավարության բյուջետային միջոցների հաշվին։
Նա «իրականությունից գերագնահատված» է համարել Արցախցիների իրավունքների պաշտպանության խորհրդի այն առաջարկը, որ անհրաժեշտ է միջազգային դոնոր համաժողով կազմակերպել՝ սոցիալական աջակցության բեռը թեթևացնելու համար։
Մարտի 29-ին արցախցիները հանրահավաք էին անցկացրել «Ազատության» հրապարակում։ Բողոքի ակցիայի նպատակներից մեկը կառավարության այն որոշման չեղարկումն էր, որով ապրիլի 1-ից բնակվարձի փոխահատուցում (40+10) կստանան ոչ թե բոլոր արցախցիները, այլ բռնի տեղահանվածների առանձին խմբեր։ Նրանք կառավարությանն իրենց պահանջները կատարելու համար 1 շաբաթ ժամանակ էին տվել։ Ապրիլի 3-ին, ՀՀ փոխվարչապետի հետ հանդիպումից հետո, արցախցիները հայտարարել էին, որ կշարունակեն պայքարը։
Արցախցիների իրավունքների պաշտպանության խորհրդի կողմից կազմակերպված հանրահավաքում ներկայացվել էր 12 կետից բաղկացած պահանջագիր՝ ուղղված ՀՀ իշխանություններին և միջազգային հանրությանը:
Արցախի ՄԻՊ Գեղամ Ստեփանյանի խոսքով՝ Լեռնային Ղարաբաղից բռնի տեղահանվածներին «40+10» աջակցության ծրագիրն ապրիլից միայն հատուկ խմբերի համար շարունակելու մասին Հայաստանի իշխանությունների որոշումը չի քննարկվել Արցախի կառավարության և խորհրդարանի ներկայացուցիչների հետ։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը Հայաստանում
