Այսպես կոչված՝ «Արևմտյան Ադրբեջան համայնքի» ղեկավար Ազիզ Ալեքբարլին ադրբեջանական լրատվամիջոցներին հայտարարել է, որ կազմակերպությունը կշարունակի իր գործունեությունը Երևանի և Բաքվի միջև համատեղ հռչակագրի ստորագրումից և խաղաղության պայմանագրի նախաստորագրումից հետո:
Նրա խոսքով՝ «համայնքի» գործունեությունը «ուղղակի կապ չունի միջպետական հարաբերությունների և խաղաղության պայմանագրի հետ»: Նա նաև հույս է հայտնել, որ խաղաղության օրակարգի առաջմղումը «կստեղծի պայմաններ արևմտյան ադրբեջանցիների՝ իրենց հայրենի վայրեր վերադառնալու համար»:
Ավելի վաղ Telegram-ի մի շարք ալիքներ հաղորդել էին, որ Ադրբեջանի իշխանությունները ծրագրում են լուծարել «համայնքը» և «Արևմտյան Ադրբեջանի» հետ կապված այլ կազմակերպությունները Վաշինգտոնում կնքված համաձայնագրերից հետո:
Օգոստոսի 8-ին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որը օգոստոսի 11-ին հրապարակվել էր ՀՀ ԱԳՆ կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
Հայկական կողմը բազմիցս հայտարարել էր, որ Բաքվի կողմից «Արևմտյան Ադրբեջան» տերմինի օգտագործումը ոտնձգություն է Հայաստանի տարածքային ամբողջականության նկատմամբ։ Հունվարին այս մասին հայտարարել էր վարչապետ Նիկոլ Փաշինյանը, իսկ հունիսին՝ Հայաստանի արտաքին գործերի նախարարությունը խոսույթը նշանակում է Բաքվի տարածքային պահանջը Հայաստանի ինքնիշխան տարածքի նկատմամբ։
