Բաքվի կողմից հրադադարի խախտումների վերաբերյալ անհիմն մեղադրանքները հնարավոր ռազմական էսկալացիայի մտահոգիչ նախանշաններ են, Վիեննայում Հայաստանի խնդրանքով հրավիրված ԵԱՀԿ մշտական խորհրդի հատուկ նիստին հայտարարել է ՀՀ ԱԳ նախարարի տեղակալ Ռոբերտ Աբիսողոմոնյանը։
Նա նշել է, որ Բաքվի մեղադրանքները հստակ և ձևավորված մի գործելաոճի մաս են, երբ Ադրբեջանն ակտիվացնում է զինադադարի ենթադրյալ խախտումների վերաբերյալ ապատեղեկատվության քարոզչությունը՝ օգտագործելով այն տարածաշրջանում հետագա լարվածության արդարացում։ Դիվանագետը հավելել է, որ 2020 և 2023 թվականներին հայկական կողմը բազմիցս ԵԱՀԿ մասնակից պետությունների ուշադրությանն է ներկայացրել նմանօրինակ մարտավարության դեպքեր։
«Կեղծ տեղեկությունների միտումնավոր տարածումը և հրադադարի խախտումների վերաբերյալ անհիմն մեղադրանքները պարզապես ճշմարտությունը խեղաթյուրելու փորձեր չեն. դրանք հնարավոր ռազմական էսկալացիայի մտահոգիչ նախանշաններ են։ Այս մարտավարության նկատմամբ պետք է զգոն լինենք, կրկնապատկենք մեր ջանքերը՝ տարածաշրջանում խաղաղության և կայունության հաստատմանն ուղղված»,- ասել է փոխնախարարը։
Նա ընդգծել է ՀՀ պատրաստակամությունը՝ ԵԱՀԿ Մինսկի գործընթացի կառույցների դադարեցման մասին՝ հավելելով, որ այս քայլը պետք է համահունչ լինի հակամարտության փաստացի և իրավական ավարտին:
«Մինսկի գործընթացի կառույցների հետագա գործունեության կարիք չի լինի այն պահից, երբ խաղաղության համաձայնագիրն ստորագրվի՝ պաշտոնական և ինստիտուցիոնալ կերպով արձանագրելով հակամարտության ավարտը: Հակառակ դեպքում՝ դա կնշանակի սայլը ձիուց առաջ դնել»,- նշել է փոխնախարարը:
Ըստ նրա՝ եթե Ադրբեջանը ցանկանում է վերջ դնել այս կառույցի գոյությանը, ապա ամենատրամաբանական և լեգիտիմ կարճ ճանապարհը համաձայնագրի ստորագրումն է:
Նա մտահոգություն է հայտնել նաև Ադրբեջանի սահմանադրության հետ կապված, քանի որ այն պարունակում է դրույթներ, որոնք ենթադրում են տարածքային հավակնություններ Հայաստանի նկատմամբ։
Փոխնախարարը նշել է, որ ՀՀ-ն չի բարձրացնում Ադրբեջանի սահմանադրությունը փոխելու հարցը, քանի որ խաղաղության համաձայնագիրը, Հայաստանի և Ադրբեջանի կողմից ստորագրվելուց, Սահմանադրությանը համապատասխանության վերաբերյալ Սահմանադրական դատարանների եզրակացությունը ստանալուց և վավերացվելուց հետո, կունենա ցանկացած ներքին օրենքի նկատմամբ գերակա իրավաբանական ուժ։
«Այս առումով՝ ցանկացած այլ հարցի առաջ քաշումը, որպես փաստաթղթի ստորագրման նախապայման, նշանակում է նվազագույնը խաղաղության հաստատման ձգձգում»,- շեշտել է նա։
Ադրբեջանը մարտի 16-ից հայտնում է Հայաստանի հետ սահմանին իր դիրքերի ուղղությամբ կրակոցների մասին։ ՀՀ պաշտպանության նախարարությունը մարտի 16-ին երեք անգամ հերքել էր Բաքվի այս տեղեկությունը։ Գերատեսչությունը հերքումներով էր հանդես եկել նաև մարտի 17-ին, 18-ին, 19-ին, 20-ին և 21-ին։ Ընդհանուր առմամբ, Ադրբեջանի պաշտպանության նախարարությունը 13 նման հաղորդագրություն է տարածել։
ՀՀ ՊՆ-ն ընդգծել էր, որ այս պահի դրությամբ՝ Բաքուն Երևանին չի փոխանցել ՀՀ ԶՈւ ստորաբաժանումների կողմից հրադադարի ռեժիմի խախտման որևէ փաստական տվյալ կամ ապացույց: Մարտի 25-ին գերատեսչությունը, մեկնաբանելով սահմանային գոտում կրակոցների մասին ԶԼՄ-ների հաղորդագրությունները, հայտնել էր, որ հայ-ադրբեջանական սահմանի երկայնքով պարբերաբար կրակոցներ են արձանագրվում, որոնք չեն թիրախավորում ՀՀ տարածքը։
