Իրանի նախագահ Մասուդ Փեզեշքիանի հետ Հայաստանում համատեղ հայտարարության ժամանակ վարչապետ Նիկոլ Փաշինյանը հայտարարեց, որ երկուստեք համաձայնել են հայ-իրանական հարաբերությունները բարձրացնել ռազմավարական գործընկերության մակարդակի։ Վարչապետը նաև նշեց, որ Փեզեշքիանի հետ բանակցությունների ընթացքում կողմերը շեշտել են Հայաստանի և Իրանի միջև միջազգային սահմանների անձեռնմխելիության և անարգել հաղորդակցության կենսական կարևորությունը։
Եկել է ռազմավարական գործընկերության ժամանակը
Փաշինյանի խոսքով՝ երկու երկրների կառավարությունների ակտիվ և կառուցողական երկխոսությունը Հայաստանի և Իրանի միջև եղբայրական հարաբերությունների կայուն զարգացման երաշխիքն է, և Փեզեշքիանի այցը Հայաստան նոր թափ և որակ կհաղորդի հայ-իրանական բարեկամական հարաբերություններին։
«Հայաստան-Իրան ներկայիս ամուր և փոխվստահելի գործընկերության հիմքում ընկած է երկու երկրների ժողովուրդների ամուր բարեկամությունը, որը պատվով է անցել ժամանակի փորձությունը և ինչ-որ առումով նաև փոխկապակցել ժողովուրդների պատմական ուղին։ Երկուստեք համաձայնեցինք, որ հասունացել է մեր երկրների հարաբերությունները ռազմավարական գործընկերության մակարդակի բարձրացնելու ժամանակը»,- ասաց Փաշինյանը։
Սահմանների անձեռնմխելիությունը կենսական նշանակություն ունի Հայաստանի և Իրանի համար
Փաշինյանի խոսքով՝ միջազգային սահմանների անձեռնմխելիության պահպանումը և անարգել հաղորդակցության ապահովումը կենսական նշանակություն ունեն Հայաստանի և Իրանի համար: Այս համատեքստում Վաշինգտոնում ստորագրված «Թրամփի միջազգային խաղաղության և բարգավաճման ուղի» (TRIPP) համաձայնագիրը տարածաշրջանում հաղորդակցությունների բացման վերաբերյալ հաշվի է առնում երկրների ինքնիշխանության, օրինականության և տարածքային ամբողջականության նկատմամբ լիակատար փոխադարձ հարգանքի սկզբունքը:
Վարչապետը հայտնեց՝ երկկողմ հանդիպմանը Փեզեշքիանին տեղեկացրել է օգոստոսի 8-ին Վաշինգտոնում ստորագրված այս հռչակագրի, ինչպես նաև Ադրբեջանի հետ համաձայնեցված խաղաղության համաձայնագրի մասին։ Վարչապետի պնդմամբ՝ Հայաստանի տարածքով անցնող հաղորդակցության ուղիները կլինեն բացառապես ՀՀ իրավասության ներքո, և դրանց անվտանգությունը կապահովի հենց Հայաստանը, «և ոչ թե որևէ երրորդ պետություն»։
«Ես ուրախ եմ և շնորհակալ եմ նախագահ Փեզեշքիանին այս համաձայնագրերի օբյեկտիվ գնահատման համար»,- շեշտեց Փաշինյանը։
ՀՀ վարչապետի խոսքով՝ տարածաշրջանում հաղորդակցությունների բացումը լայն հեռանկարներ է ստեղծում ամբողջ տարածաշրջանի տնտեսական զարգացման համար, թույլ կտա զարգացնել հայ-իրանական տնտեսական կապերը, ինչպես նաև կամրապնդի Հայաստանի դերը տարածաշրջանային տարանցիկ նախագծերում։
«Գործնականում՝ սա նոր դռներ կբացի Հայաստանի և Իրանի միջև երկաթուղային համագործակցության համար, այդ թվում՝ Նախիջևան-Ջուլֆա երկաթուղային գծի միջոցով, ինչը կնշանակի Իրանի երկաթուղային հասանելիությունը դեպի Հայաստան և, ի վերջո, դեպի Սև ծով»,- հավելեց Փաշինյանը։
Ռազմավարական նշանակության ենթակառուցվածքային ծրագրերի մշակում
Երևանի և Թեհրանի միջև տնտեսական համագործակցության զարգացման վերաբերյալ Փաշինյանը նշեց, որ երկրներն աշխատում են առևտրաշրջանառությունը մինչև 3 միլիարդ դոլար հասցնելու ուղղությամբ: Նրա խոսքով՝ ԵԱՏՄ-ի և Իրանի միջև ուժի մեջ մտնող ազատ առևտրի համաձայնագիրը նոր հնարավորություններ է բացում բիզնեսի համար:
Նա նաև տեղեկացրեց, որ Հայաստանի և Իրանի միջև մի շարք ենթակառուցվածքային ծրագրեր արդեն մտել են գործնական փուլ և ռազմավարական նշանակություն ունեն պաշտոնական Երևանի համար: Դրանց թվում, ըստ վարչապետի, Քաջարան-Ագարակ ճանապարհի 32 կիլոմետր հատվածն է, որի կառուցումը հայկական կողմը վստահել է իրանական ընկերության, ինչպես նաև հայ-իրանական սահմանին երկրորդ կամրջի կառուցման վերաբերյալ համաձայնագիրը՝ հաշվի առնելով փոխադրումների աճող ծավալները: Համաձայնություն է ձեռք բերվել հայ-իրանական սահմանին երկրորդ կամրջի կառուցման վերաբերյալ:
«Էներգետիկ ոլորտի ընթացիկ կարևորագույն նախագիծը Հայաստան-Իրան էլեկտրահաղորդման երրորդ գիծն է: Երրորդ գծի շահագործման շնորհիվ Հայաստանը կկարողանա ավելի շատ էլեկտրաէներգիա արտահայտել Իրան»,- հավելեց վարչապետը։
