ՀԷՑ ՓԲԸ-ի ժամանակավոր կառավարիչ Ռոմանոս Պետրոսյանի նախաձեռնությամբ չեղարկվել է գնման 4 գործընթաց. ընդհանուր՝ ավելի քան 3 մլրդ դրամ նախահաշվային արժեքով, հայտնում է ընկերության մամուլի ծառայությունը։
Նշվում է, որ տվյալ գնումների գործընթացների միջոցով նախատեսվում էր ձեռք բերել ներդրումային ծրագրի շրջանակներում նախատեսված մի շարք աշխատանքների համար անհրաժեշտ էլեկտրատեխնիկական սարքավորումներ, հաշվիչներ, մալուխ, ինչպես նաև մի քանի լոտով առանձին ծառայություններ:
«Ժամանակավոր կառավարչի կողմից գնումների այդ գործընթացների կասեցումը պայմանավորված է ընկերությունում այդ գործընթացներին առնչվող ընթացակարգերում վեր հանված մի շարք համակարգային խնդիրներով (խտրական տեխբնութագրեր, ոչ ներառական և անթափանցիկ գործընթացներ, նախնական գնանշման ոչ օբյեկտիվ մոտեցումներ և այլն)»,- ասվում է հաղորդագրության մեջ:
Ըստ ընկերության՝ համակարգային մոտեցմամբ լավարկվում են գնումների ընթացակարգերը, որոնց ներդրումից հետո միայն կմեկնարկեն գնումների գործընթացները: Դրանք, ըստ հաղորդագրության, կմեկնարկեն 2025 թվականի օգոստոսի առաջին տասնօրյակից:
2025 թվականի հուլիսի 18-ին Պետրոսյանը նշանակվել էր ՀԷՑ ընկերության ժամանակավոր կառավարիչ։ Այս որոշումը ՀԷՑ-ը պետական կառավարման հանձնելու՝ կառավարության քաղաքականության մի մասն էր։ Հուլիսի 24-ին ՀԷՑ-ի մամուլի ծառայությունը հայտարարել էր նոր բարձրաստիճան ղեկավարների նշանակման մասին։
ՀԷՑ-ի գործադիր տնօրենի տեղակալի և վաճառքի տնօրենի պաշտոնից ազատված Դավիթ Ղազինյանն Armenia Today-ին հայտնել էր, որ դատական հայց է ներկայացրել՝ պահանջելով անվավեր ճանաչել ազատման որոշումը և վերականգնել իր պաշտոնում։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
