ՀՀ վարչապետ Նիկոլ Փաշինյանն սպառնացել է աշխատանքից ազատել ՀԷՑ-ի այն ներկայացուցիչներին, որոնք իբրև թե աշխատակիցներին ստիպում են գնալ դատարան, որտեղ ընթանում է ընկերության սեփականատեր Սամվել Կարապետյանի դատավարությունը:
Փաշինյանն ասել է, որ ՀԷՑ-ը շուտով կդառնա պետական սեփականություն, որից հետո նրանց «ներում չի լինելու»։
«Տեսեք՝ հետո չասեք, վա՜յ, բոլորն ազատվելու են աշխատանքից։ Այն ԶՊՄԿ-ի ուժեղ տղերքի նման ծնկաչոք գալու եք մեր դռների դեմը կանգնեք, տեսե՛ք, ոչ մեկին ներում չի լինելու։ Նրանք, ովքեր ապօրինությունների մեջ փութաջանություն են ցուցաբերել, չգիտեմ, հետո «Տաշիր Պիցցա»-ում կարող են աշխատել»,- զգուշացրել է վարչապետը:
Ավելի վաղ Սննդի տեսչական մարմինը ժամանակավորապես կասեցրել էր «Տաշիր Պիցցա»-ի 4 մասնաճյուղի գործունեություն՝ արձանագրված խախտումները վերացնելու նպատակով, իսկ ևս 30-ում ստուգումներ իրականացրել։
Միևնույն ժամանակ՝ Փաշինյանը խոստացել է խրախուսել ՀԷՑ-ի այն աշխատակիցներին, որոնք կհրաժարվեն մասնակցել Կարապետյանի աջակցության հանրահավաքին և «կահազանգեն, կհամագործակցեն իրավապահ մարմինների աշխատակիցների հետ, կտան կոնկրետ ցուցմունքներ»:
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը, հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
Հունիսի 18-ի գիշերը` խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե: Նրան մեղադրանք էր առաջադրվել իշխանության բռնի զավթման հրապարակային կոչի համար: Նա մեղադրանքը չի ընդունում:
Մանրամասն՝ տեսանյութում։
