«Տաշիր Պիցցա» հանրային սննդի կասեցված մասնաճյուղերի թիվը հասել է 4-ի, տեղեկանում ենք Սննդամթերքի անվտանգության տեսչական մարմնի հաղորդագրություններից։
ՍԱՏՄ-ն հայտնել է, որ խախտումներ է հայտնաբերել Երևանի Իսահակյան 22, Տերյան 69, Ծիծեռնակաբերդի խճուղի 3 հասցեներում գտնվող մասնաճյուղերում, որոնց արտադրական գործունեությունը կասեցվել է, սահմանվել է ժամկետ՝ խախտումները վերացնելու համար:
«Պիցցա Տաշիր» ՍՊԸ-ից տեղեկացրել են, որ մասնաճյուղերում հայտնաբերել են սանիտարահիգիենիկ նորմի խախտումներ։ Ըստ ՍԱՏՄ-ի՝ առաստաղները կառուցված չեն այնպես, որ կանխարգելվի կամ նվազեցվի կեղտի կուտակումը, սննդամթերքի հետ անմիջական շփման մեջ գտնվող աշխատանքային մակերևույթների մի մասը նորոգված չէ, պատրաստված չէ հարթ, մաքրվող, կոռոզիայի չենթարկվող, ախտահանվող նյութերից:
ՍԱՏՄ-ից հավելել են, որ «Պիցցա Տաշիր» ՍՊԸ-ի կողմից ՍԱՏՄ ներկայացված դիմումի համաձայն՝ այս պահին վերահսկողություն է իրականացվում այդ կազմակերպությանը պատկանող 30 հանրային սննդի կետերում:
Հունիսի 18-ին ՍԱՏՄ-ն հայտնել էր նաև «Տաշիր Պիցցա»-ի՝ Երևանի Մաշտոցի 50 հասցեում գործող մասնաճյուղի գործունեությունը կասեցնելու մասին։
«Պիցցա Տաշիր» ՍՊԸ-ն պատկանում է «Տաշիր» ընկերությունների խմբին, որի նախագահ Սամվել Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը, հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
Հունիսի 18-ի գիշերը` խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե: Նրան մեղադրանք էր առաջադրվել իշխանության բռնի զավթման հրապարակային կոչի համար: Նա մեղադրանքը չի ընդունում:
Կարդացեք նաև
ՔԿ-ն Սամվել Կարապետյանին կալանավորելու միջնորդություն է ներկայացրել դատարան
