ՀՀ կառավարությունը 60 մլն դրամ կհատկացնի Լիբանանին մարդասիրական օգնություն տրամադրելու համար։ Որոշման նախագիծը մշակվել է երկրում ստեղծված պատերազմական իրավիճակով պայմանավորված հումանիտար ճգնաժամին արձագանքելու նպատակով։
Հատկացվող գումարից 34 մլն դրամը կուղղվի Էկոնոմիկայի նախարարությանը՝ պարենային ապրանքների և սանիտարահիգիենիկ պարագաների ձեռքբերման համար, իսկ 26 մլն դրամը կհատկացվի Առողջապահության նախարարությանը՝ անհրաժեշտ դեղորայքի գնման նպատակով։
Աջակցության տրամադրման համար ապրանքների ցանկը նախապես համաձայնեցվել է Արտաքին գործերի նախարարության հետ։
Հաշվի առնելով իրավիճակի հրատապությունը՝ գնումները նախատեսվում է իրականացնել «մեկ անձից գնման» ընթացակարգով։ Գումարը կհատկացվի կառավարության պահուստային ֆոնդից՝ 2026 թվականի պետական բյուջեի վերաբաշխման միջոցով։
Մարտի 2-ի տվյալներով՝ ռազմական էսկալացիայի սկսվելուց ի վեր զոհված քաղաքացիական անձանց ընդհանուր թիվը Լիբանանում հասել էր 2659-ի, իսկ վիրավորներինը՝ 8183-ի։
ԱՄՆ նախագահ Դոնալդ Թրամփն Իսրայելի վարչապետ Բենյամին Նեթանյահուի և Լիբանանի նախագահ Ջոզեֆ Աունի հետ ապրիլի 16-ին բանակցությունների արդյունքում հայտարարել էր Իսրայելի և Լիբանանի միջև տասնօրյա հրադադարի մասին: Ավելի ուշ հրադադարը երկարաձգվել էր։
