ԱՄՆ նախագահ Դոնալդ Թրամփը, ելույթ ունենալով Վաշինգտոնի Խաղաղության խորհրդի նիստում, կրկին հիշատակել է Հայաստանի և Ադրբեջանի միջև հակամարտության կարգավորումը։
«Մենք այդ խնդիրը լուծեցինք մոտ 24 ժամվա ընթացքում»,- հայտարարել է Թրամփը։
Նա կարծիք է հայտնել, որ խորհրդի նիստին մասնակցող Հայաստանի և Ադրբեջանի առաջնորդներ Նիկոլ Փաշինյանը և Իլհամ Ալիևն ընկերներ են դարձել։
«Կարծում եմ՝ նրանք ընկերացել են։ Վստահ չեմ, թե ինձ թույլատրվում է սա ասել, բայց կարծում եմ՝ այո»,- ասել է նախագահը՝ կոչ անելով երկու առաջնորդին ոտքի կանգնել։
Նշելով, որ Փաշինյանն ու Ալիևը «լավ, բայց բարդ մարդիկ» են, Թրամփը պատմել է 2025 թվականի օգոստոսին Վաշինգտոնում ձեռք բերված համաձայնությունների հանգամանքների մասին։ Նրա խոսքով՝ Սպիտակ տանը բանակցությունների սկզբում առաջնորդները նստել էին սենյակի հակառակ անկյուններում, բայց նա հորդորել էր կողք-կողքի նստել։
«Մեկ ժամվա ընթացքում նրանք կողք-կողքի էին։ Մենք գործարք կնքեցինք։ Նրանք գրկախառնվեցին, ստորագրեցին, և խաղաղություն ունեցանք երկու շատ կարևոր երկրների միջև, և ես երբեք դա չեմ մոռանա։ Նրանք սկսեցին մի փոքր թույլ, և վերջում դարձան շատ ուժեղ, և դուք կարող եք հպարտանալ ինքներդ ձեզնով»,- ասել է Թրամփը, որից հետո Փաշինյանն ու Ալիևն իրար ձեռք են սեղմել։
ԱՄՆ փոխնախագահ Ջեյ Դի Վենսը նույնպես շնորհակալություն է հայտնել Հայաստանի և Ադրբեջանի առաջնորդներին։
«Շնորհակալություն, որ սա հնարավոր դարձրեցիք, որ ցույց տվեցիք, թե ինչի կարող է հասնել իսկական առաջնորդությունը։ Երբ դուք հրաժարվում եք զենքից, սպանություններից և ավերածություններից, ներդրում եք կատարում ձեր ժողովրդի և բարգավաճման մեջ»,- ասել է նա։
Խաղաղության խորհուրդն ստեղծվել էր հունվարի 22-ին։ Հայաստանն այն 19 երկրներից մեկն էր, որոնք ստորագրել էին խորհրդի հիմնադրման փաստաթուղթը։ Խաղաղության խորհրդի ստեղծման գաղափարը, որը նախաձեռնել է Թրամփը, նախատեսում է միջազգային հարթակի ստեղծում Գազայի հակամարտության կարգավորման համար՝ դրա մանդատը այլ ճգնաժամերի վրա ընդլայնելու հնարավորությամբ։ Փետրվարի 9-ին ՀՀ վարչապետ Նիկոլ Փաշինյանը հայտարարել էր, որ ընդունել է Թրամփի հրավերը՝ մասնակցելու փետրվարի 19-ին նախատեսված Խաղաղության խորհրդի առաջին նիստին։ Փետրվարի 12-ին Իսրայելը ևս միացել էր Խաղաղության խորհրդին։
