Հուլիսի 20-ին «Տաշիր» ընկերությունների խմբի ղեկավար, բարերար Սամվել Կարապետյանն իր պաշտպանության խմբի միջոցով կալանավայրից ուղերձ է հրապարակել, որում խոսել է արդարությունն ու արդարադատությունը վերականգնելու հնարավորության մասին։
«Ես ու մեր ընտանիքը մեր ամբողջ կյանքի ընթացքում, հնարավորությունների սահմանում ամեն ինչ արել ենք՝ օգնելու Հայաստանի Հանրապետությանը և հայ ժողովրդին։ Մեր արածի ծավալների մասին ուզում եմ առաջին անգամ հակիրճ խոսել։ Վստահ եմ, որ վերջին 17 տարիների ընթացքում միայն կրկնապատկել ենք աշխարհասփյուռ հայության ներդրումները հայրենիքում ու ստեղծել աշխատատեղեր, որ մեր ժողովուրդն ապրի իր հայրենիքում ու վաստակի իր հանապազօրյա հացը։ Այս ամենի մասին միշտ համեստորեն լռել ենք»,- ընդգծել է Կարապետյանը։
Գործարարը շեշտել է, որ միայն այս փուլում է հասկացել՝ «հայրենիքին այսօր ավելի է անհրաժեշտ պայքարելու ու չհանձնվելու կամքը»։ Նա մի դրվագի մասին է պատմել, ինչին ամեն օր ականատես է լինում կալանավայրի միջանցքներում ու տեսակցության վայրերում։
«Կալանավայրի միջանցքներում ու տեսակցության վայրերում ամեն օր զարմանում եմ, թե որքա՞ն ծաղկուն տարիքի տղաներ են այստեղ գտնվում։ Վստահ եմ՝ նրանցից շատերն ինձ նման՝ անօրինական որոշումների հիման վրա։ Ոմանք էլ ոչ մեծ հանցագործոթւյունների արդյունքում են հայտնվել այստեղ և չվախենալով հսկիչների ներկայությունից՝ բղավում են, որ իրենց վերջին հույսը ես եմ»,- նշել է Կարապետյանը։
Նա տեղեկացրել է, որ իր փաստաբանական խմբի բազա են հրավիրելու տարբեր անաչառ փաստաբանների, որոնք պատրաստ են աջակցել ու վերանայել վերջին 7 տարիների այդպիսի գործերը։
«Պատրաստ ենք պայքարել յուրաքանչյուր հայ մարդու խախտված իրավունքների համար։ Այս ամենի համար պատրաստ եմ միջոցներ տրամադրել։ Շուտով արդարությունը և արդարատությունը վերականգնվելու են։ Պայքարելու ենք՝ մեր ձևով»,- եզրափակել է գործարարը։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Հուլիսի 4-ին ի աջակցություն Կարապետյանի տեղի ունեցած հանրահավաքին գործարարը փաստաբանների միջոցով կալանավայրից ուղերձ էր հղել՝ կոչ անելով միավորվել նոր քաղաքական ուժի շուրջ: Հուլիսի 14-ին գործարարը տեղեկացրել էր, որ քաղաքական թիմի ձևավորումը մեկնարկել է։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
