«Մայր Հայաստան» կուսակցության նախագահ Անդրանիկ Թևանյանի դեմ առաջադրված մեղադրանքում պետական գաղտնիք հավաքելու կամ փոխանցելու դրվագ չկա, ըստ այդմ՝ խափանման միջոց կիրառելու հիմքեր չկան, հայտարարել է փաստաբան Արամ Օրբելյանը։
«Փորձում ենք հասկանալ՝ ինչն է պետական գաղտնիք։ Ո՛չ մեղադրանքի նկարագրությունը, ո՛չ էլ նյութերը որևէ այլ քրեական հոդվածի հետ կապված հանգամանք չունեն։ Մեր կարծիքով՝ խափանման միջոց կիրառելու և քրեական հետապնդում հարուցելու հիմքեր չկան։ Պետական գաղտնիքի մասին պնդումից հրաժարվեցին։ Մեղադրանքի մեջ պետական գաղտնիք հավաքել-փոխանցել չկա»,- լրագրողների հետ զրույցում ասել է Օրբելյանը։
Փաստաբանի խոսքով՝ մեղադրանքը չի պարունակում նաև պետական դավաճանության կամ լրտեսության որևէ տարր։ Նա նշել է, որ գործի նկարագրությունը վերաբերում է տեղեկատվության փոխանցմանն ու տարածմանը, ինչին, ըստ նրա, կարող է առնչվել նաև լրագրողական գործունեություն իրականացնող անձը։
«Նկարագիրը, ինչում մեղադրում են, բոլոր լրագրողները կարող են անցնել՝ ինչ-որ ինֆորմացիա եք տարածում, ինչ-որ բան ինձնից հարցրել եք, ասել եմ և այլն»,- ասել է Օրբելյանը։
Փաստաբանը հավելել է, որ պաշտպանական կողմը չի տեսնում ո՛չ խափանման միջոց կիրառելու, ո՛չ էլ քրեական հետապնդում հարուցելու բավարար հիմքեր։
Նիստի ընթացքում Թևանյանի կողմնակիցներն ակցիա են անցկացրել դատարանի դիմաց։ Նրանք վանկարկել են՝ «Նիկոլ Վովայի Փաշինյան, այս երկրում կա մեկ դավաճան և այդ մեկ դավաճանը դու ես, և այդ մեկ դավաճանը դու ես», «Այս երկրում կա մի մարդ, որ պատրաստ է թշնամու համար լրտեսություն անել և այդ մեկ մարդը դու ես»։
Երևանի ավագանու «Մայր Հայաստան» խմբակցության ղեկավար Մանուկ Սուքիասյանը հայտարարել է, որ բոլորին ստի, կեղծիքի հիման վրա չի ստացվելու վարկաբեկել։ Նա, ադրադառնալով մեղադրանքին, նշել է, որ այն անհեթեթություն է, անլուրջ է և ոչ մի հիմք չկա։
«Այդ ամենը կրում է քաղաքական պատվերի բնույթ։ Խախտվել է Սահմանադրությունը, քանի որ պաշտոնատար անձը, որին պաշտոնեական գործունեության բերումով հայտնի են դարձել պետական մակարդակի տեղեկություններ, իրավունք չունի դա օգտագործել նախընտրական քարոզարշավի ժամանակ»,- ասել է նա։
Ավելի ուշ Օրբելյանը հայտնել է, որ Թևանյանի կալանավորման միջնորդության հարցով նիստն ավարտվել է, դատարանը հեռացել է որոշում կայացնելու։ Նրա խոսքով՝ որոշումը կհրապարակվի օրվա ընթացքում։ Փաստաբանը նշել է, որ նիստի ժամանակ բացի իրավաբանական լուրջ խնդիրներից ներկայացրել են նաև գործընթացի քաղաքական ենթատեքստը։
«Ներկայացրել ենք ընտրությունների քարոզարշավին խոչընդոտելը, քանի որ Թևանյանը հանդիսանում է ԲՀԿ ցուցակի երկրորդ համարը և ակտիվ քարոզչական գործունեություն էր նախատեսվում»,- ասել է Օրբելյանը։
Նա հավելել է, որ դատարանի որոշումից հետո կհայտնեն պաշտպանական կողմի հետագա քայլերը։
Թևանյանի նկատմամբ գործողություններն սկսվել էին ՀՀ վարչապետ Նիկոլ Փաշինյանի՝ նրա դեմ պետական դավաճանության հոդվածով քրեական գործ հարուցելու մասին հայտարարությունից մեկ օր անց։
Քննչական կոմիտեն մայիսի 21-ին հայտնել էր Թևանյանի նկատմամբ պետական դավաճանության և լրտեսության փաստով քրվարույթ նախաձեռնելու մասին՝ պատգամավոր լինելու ժամանակ խորհրդարանի՝ 2024-ի փակ նիստի տվյալների հնարավոր հրապարակման պատճառով։
Թևանյանն անհեթեթ էր անվանել իրեն առաջադրված մեղադրանքները՝ նշելով, որ 2023-ին մանդատը վայր էր դրել, և 2024-ին ֆիզիկապես չէր կարող ԱԺ-ում լինել։
