Քննչական կոմիտեն կարգալույծ եպիսկոպոս, Մասյացոտնի թեմի նախկին առաջնորդ Արման Սարոյանի (օծյալ անունը՝ Գևորգ-խմբ.) մասով դատական ակտը չկատարելու և կարգալույծ հայտարարելու հիմքով քրեական վարույթ է նախաձեռնել, տեղեկանում ենք ՔԿ հաղորդագրությունից։
Ամենայն Հայոց կաթողիկոս Գարեգին Բ-ն հունվարի 10-ին Սարոյանին ազատել էր պաշտոնից։ ՀՀ վարչապետ Նիկոլ Փաշինյանը հայտարարել էր, որ չի ճանաչում այդ որոշումը, իսկ Սարոյանը հայց էր ներկայացրել Մայր Աթոռ Սուրբ Էջմիածնի դեմ՝ պահանջելով վերականգնել թեմի առաջնորդի պաշտոնը։ Հունվարի 16-ին դատարանը Սարոյանին վերականգնել էր Մասյացոտնի թեմի առաջնորդի պաշտոնում մինչև վերջնական դատական ակտը, իսկ հունվարի 27-ին կաթողիկոսը նրան կարգալույծ էր հռչակել։
Ըստ ՔԿ հաղորդագրության՝ դատարանը, միաժամանակ, արգելել է որևէ գործողություն, որը կարող է խոչընդոտել Սարոյանի լիազորությունների իրականացմանը, այդ թվում՝ թեմի ֆինանսական միջոցների տնօրինմանը։
Կոմիտեից նշել են, որ դատարանի որոշման հիման վրա հարուցվել է կատարողական վարույթ, և այն հունվարի 19-ին պաշտոնապես հանձնվել է Մայր Աթոռին։ ՔԿ-ից հավելել են, որ չնայած գործող դատական ակտին՝ հունվարի 27-ին Գերագույն հոգևոր խորհուրդը հայրապետական տնօրինությամբ Սարոյանին հայտարարել էր կարգալույծ։
Կոմիտեն, նկատի ունենալով, որ կատարողական վարույթի շրջանակներում փաստվում են եկեղեցու ծառայողների կողմից օրինական ուժի մեջ մտած դատական ակտը չկատարելու և այն չկատարելուն դրդելու առերևույթ հանցագործության դեպքեր, այսօր նախաձեռնել է քրեական վարույթ՝ դատական ակտը չկատարելու կամ դրա կատարմանը խոչընդոտելու (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով) համար, որով իրականացվում են վարութային և ապացուցողական գործողություններ:
