Տեր Վրթանես քահանա Բաղալյանի կյանքին վտանգ չի սպառնում, հայտնել է Հայր Զաքարիա վարդապետ Բաղումյանը։
Հայր Զաքարիան մանրամասնել է, որ քիչ հետո կստենտավորեն նրա սիրտը:
Մայր Աթոռ Սուրբ Էջմիածնում այսօր վատթարացել էր Տեր Վրթանեսի ինքնազգացողությունը, որի հետո նա հոսպիտալացվել էր։
Ավելի ուշ Հայր Զաքարիան հայտնել է, որ Տեր Վրթանեսի համար որոշիչ են մոտակա 72 ժամերը։
«Բժիշկներն այս պահի դրությամբ արել են առավելագույնը: Երեցկինը մի քանի րոպե տեսակցել է նրան և խոսել: Տեր Հայրը մեկ հարց է տվել՝ ամեն ինչ կարգի՞ն է Մայր Աթոռում»,- նշել է նա։
Ամենայն Հայոց կաթողիկոս Գարեգին Երկրորդի կողմնակիցների և նրա հրաժարականը պահանջողների միջև հրմշտոցների ժամանակ վատացել է նաև Armenia Today-ի թղթակից Անի Ներկարարյանի ինքնազգացողությունը։ Նրան տեղում օգնություն է ցուցաբերել պարեկային ծառայությունը։
Մայր Աթոռում Սուրբ Էջմիածնում այսօր տեղի էր ունեցել հավաք՝ ի աջակցություն կաթողիկոսի, զուգահեռաբար՝ այնտեղ էին հավաքվել նաև վեհափառի դեմ արտահայտվողները: Գարեգին Բ-ն Մայր Աթոռում ժամերգության ընթացքում նշել էր, որ եկեղեցում առկա խնդիրները պետք է լուծվեն կանոնական կարգով: Նա հորդորել էր եկեղեցում հավաք հրավիրած եպիսկոպոսներին վերադառնալ կանոնական դաշտ:
