ՀՀ իշխանությունները խոչընդոտում են բնակչությանն էլեկտրաէներգիա ստանալ ավելի մատչելի գնով, Armenia Today-ի հետ զրույցում հայտարարել է «Մեր ձևով» շարժման համակարգող խմբի անդամ Արթուր Միքայելյանը:
Նա նշել է, որ «Հայաստանի էլեկտրական ցանցեր» ընկերության սեփականատեր և «Տաշիր» ընկերությունների խմբի նախագահ Սամվել Կարապետյանը պատրաստ էր նվազեցնել սակագինը, սակայն իշխանությունները մերժել են առաջարկն առանց բացատրության: Միքայելյանի խոսքով՝ այս դեպքում իշխանություններն առաջնորդվում են ոչ թե հանրային, այլ քաղաքական շահերով:
Նա նաև կարծիք է հայտնել, որ Հանրային ծառայությունները կարգավորող հանձնաժողովը (ՀԾԿՀ) կարող է դիտավորյալ հետաձգել որոշումը մինչև ընտրությունների շրջանը, որպեսզի սակագնի նվազեցումը ներկայացնի որպես սեփական նախաձեռնություն:
«Հանձնաժողովը մերժում է սակագնի վերանայումը, այստեղ խոսքը գնում է զգալի մեծ գումարի մասին՝ շուրջ 3,6 մլրդ դրամ, որը տարվա վերջ մոտավորապես կրկնապատկվել է։ Այստեղ անհասկանալի է, թե ինչո՞ւ է պետությունը քաղաքացիների համար սակագինն իջեցնելու խոչընդոտ հանդիսացել»,- նշել է նա։
Մեկնաբանելով Հայ Առաքելական եկեղեցու շուրջ ստեղծված իրավիճակը՝ Միքայելյանը նշել է, որ իշխանությունների կողմից հոգևորականության դեմ ուղղված գործողությունները նպատակ ունեն թուլացնել եկեղեցու դերը և խաթարել ազգային ինքնությունը։ Նրա խոսքով՝ այս քայլերն ուղղված չեն կաթողիկոսի կամ առանձին հոգևորականների դեմ, այլ նպատակ ունեն «գլխատել» եկեղեցին։
Նա ընդգծել է, որ եկեղեցին մնում է հայ ինքնության հիմնասյուներից մեկը, և դրա նկատմամբ ճնշումն ընկալվում է որպես հարձակում հենց ժողովրդի վրա։
«Մի կողմից իշխանությունը հայտարարում է, որ եկեղեցուն հարված չեն հասցնում, մյուս կողմից կալանավորում են հոգևորականներին։ Բայց պետք է գիտակցել, որ եկեղեցին առանց հոգևորականի կամ հոգևորականն առանց եկեղեցու գոյություն ունենալ չեն կարող, նրանք միասին մեկ մարմին են։ Հետևաբար, հարվածելով հոգևորականին, հարված է հասցվում Հայ Առաքելական սուրբ եկեղեցուն»,- ասել է նա։
Միքայելյանի խոսքով՝ հոգևորականների ձերբակալությունները և կառավարության ճնշումն ստեղծում են վտանգավոր նախադեպ, և երկրում խոսքի ազատությունը շարունակում է զգալիորեն սահմանափակվել։
Միքայելյանը նաև անդրադարձել է հանրային քննարկմանը, թե ի՞նչն է ավելի կարևոր՝ դպրոցնե՞ր, թե՞ գործարաններ կառուցելը։ Նա կարծում է, որ առանց ուժեղ տնտեսության և զարգացած արտադրության անհնար է ստեղծել կայուն կրթական համակարգ։
«Մեր ձևով» շարժման ներկայացուցիչը նշել է, որ միայն դպրոց կառուցելը չի լուծում խնդիրը. եթե մեկը կրթություն է ստանում, բայց աշխատանք չունի, նրա գիտելիքները երկրին օգուտ չեն տա։ Միքայելյանի խոսքով՝ նախ պետք է զարգացնել արդյունաբերությունը, ապա բարելավել կրթությունը։
«Չստորադասելով կրկին դպրոցաշինությունը, որը միայն շենքերի վերանորոգմամբ կամ պատերը ներկելով չի սահմանափակվում, առաջին հերթին՝ պետք է ստեղծել ուժեղ արդյունաբերական պետություն, որ մարդը կրթությունն ավարտելուց հետո վստահ լինի, որ իր հայրենի երկրում ունի աշխատանք»,- շեշտել է նա։
Մանրամասները՝ տեսանյութում։
