Ազգային ժողովի «Պատիվ ունեմ» խմբակցության քարտուղար, անվտանգության հարցերով փորձագետ Տիգրան Աբրահամյանն Armenia Today-ին տված հարցազրույցում գնահատել է Ադրբեջանի հետ խաղաղության բանակցությունները, պաշտպանական համակարգի փոփոխությունները և ՀՀ անվտանգության ապահովման հիմնական տեսլականը։
Աբրահամյանի խոսքով՝ մինչ հայկական կողմը կարծում է, որ անվերջ զիջողականությունը կանխելու է հնարավոր պատերազմն Ադրբեջանի հետ, Բաքուն, օգտագործելով Հայաստանի այսօրվա վիճակը և իշխանությունների սխալ դիրքավորումը, իր առջև Հայաստանի հետ բանակցություններում առավելագույնն ստանալու նպատակ է դրել։
Աբրահամյանը, գնահատելով Հայաստանի պաշտպանական համակարգի բարեփոխումը, ընդգծել է, որ տպավորություն է ստեղծվում, թե սպառազինությունների զարգացման, կիրառելիության և պատերազմների մեթոդների տեսանկյունից լուրջ վերլուծություն չկա։
«Աշխարհի տարբեր երկրներում, այդ թվում՝ Արցախում և Հայաստանի ուղղությամբ, ռազմական գործողությունները վերլուծելու դեպքում ակնհայտ է, որ պատերազմների վարման մեթոդներն աստիճանաբար փոխվում են։ Հարց է առաջանում, թե ո՞ր զինատեսակներն են գերակա և որո՞նք են խնդիր լուծում։ Հաղթում են նրանք, ովքեր անօդաչու սարքերի առավելություն ունեն, առաջին պլան է եկել նաև գերճշգրիտ հրթիռների կիրառումը»,- ասել է Աբրահամյանը։
Նա ընդգծել է, որ այս փոփոխությունները հաշվի առնելով՝ ՀՀ ԶՈւ-ի և, առհասարակ, անվտանգության տեսլականը պետք է կառուցվի նորույթների հիման վրա։ Անվտանգության զարգացումն ապահովելու համար, ըստ նրա, պետք է հաշվի առնել այն դինամիկան, որը կա սպառազինությունների զարգացման, պատերազմների վարման տեսանկյունից։ Նրա խոսքով՝ Ադրբեջանը, որի բանակի հզորացան հարցում Թուրքիան բավականին մեծ ներդրում ունի, ակնհայտորեն հետևում է այդ դինամիկային։
Ըստ Աբրահամյանի՝ սպառազինություն ձեռք բերելու մոտեցման հիմքում պետք է պարզ պարամետր լինեն, մասնավորապես, որ զինատեսակն ինչ խնդիր լուծելու, ինչ նպատակով է ձեռք բերվում։ Պետք է կազմել առաջնահերթություններ, որոնց թվում պետք է գնահատել նաև հնարավոր պոտենցիալ թշնամու զինված ուժերի և նրա պոտենցիալը։
Նրա խոսքով՝ իշխանություններն զբաղվում են պոպուլիզմով և չեն պատկերացնում, թե ինչ վտանգ կարող է սպառնալ Հայաստանի Հանրապետությանը և այդ վտանգի պարագայում ինչպե՞ս կարելի է կազմակերպել երկրի պաշտպանությունը։
«Իմ տպավորությամբ՝ Հայաստանի իշխանությունն այս պահին մի խնդիր ունի՝ ցույց տալ, թե որևէ բանից հետ չեն մնում և պատրաստ են պատերազմի։ Բայց դրա էֆեկտիվությունը կամ ԶՈւ մարտունակության վիճակը տարբեր հարթությունների հարցեր են, և որևէ առնչություն չունեն այն պոպուլիզմի և հնչող հռետորականության հետ, որն ունի Հայաստանի կառավարությունը կամ դրա ղեկավարը»,- ասել է Աբրահամյանը։
Անդրադարնալով Հայաստանի ներքաղաքական իրավիճակին և Սահմանադրության փոփոխության հանրաքվե անցկացնելու իշխանությունների մտադրությանը՝ Աբրահամյանն ընդգծել է, որ դա արվում է ոչ թե քաղաքացու անվտանգությունը, բարեկեցությունը մեծացնելու համար, այլ իրականացվում է Բաքվի պահանջով։
«Օրեր առաջ Արդարադատության նախարարը (Սրբուհի Գալյան-խմբ․) մի տխրահռչակ հայտարարություն հնչեցրեց՝ ասելով, որ իշխանությունը դեռևս 2018-ից անմիջապես հետո ուզում էր Սահմանադրություն փոխել։ Այսպիսով՝ նա փորձում է հիմնավորել, թե այս մտադրությունը ոչ թե Ադրբեջանի պահանջն է, այլ բխում է Հայաստանի իշխանությունների առաջնահերթություններից։ Դուք պատկերացնո՞ւմ եք թե այս հայտարարությունն ինչ է ասում մեր պետության, պետական կառավարման համակարգի կամ իշխող ուժի մասին։ Այսինքն՝ կա մի իշխանություն, որը 7 տարի է՝ իշխանության է ու, փաստորեն, իր պաշտոնավարման առաջին օրից փորձել է Սահմանադրություն փոփոխել, որը ոչ միայն չի իրականացրել, այլև տեքստ չկա, որը հանրային քննարկումների դաշտում կլիներ։ Այսինքն, եթե նույնիսկ սա է հիմնավորումը, ապա նշանակում է, որ այս պետական ապարատն իր կառավարման համակարգով ո՛չ ներքին, ո՛չ էլ առավել ևս արտաքին խնդիր լուծելու հնարավորություն և ունակություն չունի»,- նշել է նա։
Ըստ Աբրահամյանի՝ ընդդիմադիր դաշտում պառակտում, որպես այդպիսին, չկա։ Նա ընդգծել է, որ չնայած որոշ գործընթացների վերաբերյալ տարբեր տեսակետներին՝ ընդդիմադիր դաշտում ներկայիս իշխանության դեմ պայքարի անհրաժեշտության շուրջ կա համագործակցություն։
Մանրամասները՝ տեսանյութում։
