Եվրոպական միության ընդլայման հարցերով հանձնակատար Մարթա Կոսը պատմել է, որ Հայաստան կատարած վերջին այցից բերված հայկական ծիրանից ջեմ է պատրաստել, և Եվրամիության երկրների բնակիչներին կոչ է արել հայկական մրգեր գնել։
Կոսի խոսքով՝ ծիրանի մի մասը նա բաժանել է ընկերներին, իսկ մնացածից ջեմ է պատրաստել։
Կոսը նաև մեղադրել է Ռուսաստանին Հայաստանի խորհրդարանական ընտրությունների վրա ազդելու փորձերի մեջ՝ մրգերի և ծաղիկների ներմուծումը սահմանափակելու միջոցով։ Նրա խոսքով՝ Եվրոպական միությունն, իր հերթին, բացել է իր շուկան այդ արտադրանքի մի մասի համար։
Կոսը նաև ԵՄ բնակիչներին կոչ է արել խանութներում ուշադրություն դարձնել հայկական ծիրանին, սալորին և կեռասին։ Նա նշել է, որ այդ մրգերի գնումը կօգնի հայ ֆերմերներին և կաջակցի Հայաստանի «դեմոկրատական ընտրությանը»։
Մայիսի վերջից և հունիսի սկզբից «Ռոսսելխոզնադզորն» արգելել էր Հայաստանից ծաղիկների, մրգերի, բանջարեղենի և չրերի ներմուծումն ու տարանցումը ՌԴ, ինչպես նաև պահանջել էր կասեցնել ձկնամթերքի և ձկան անասնաբուժական սերտիֆիկատների ձևակերպումը և հայտնել անորակ ալկոհոլային արտադրանքի հայտնաբերման մասին։ Սահմանափակումները կգործեն մինչև հայկական կողմը մշակի անվտանգության ապահովման համապատասխան ընթացակարգ։
Այս ֆոնին Հայաստանի իշխանությունները հունիսի սկզբին հայտարարել էին այլ երկրներ արտահանման հնարավորության և ՌԴ սահմաններից վերադարձվող ապրանքների սուբսիդավորման մասին։ Միաժամանակ Երևանից ընդգծել էին, որ նպատակ չունեն ռուսական շուկայից արտահանումը վերաուղղել դեպի Եվրոպա։
Հունիսին Հայաստանից Լատվիա արտահանվել է 5500, Լիտվա՝ 11 000, իսկ Ուկրաինա՝ 9500 ծաղիկ։ «Ռոսսելխոզնադզորում» նշել էին, որ 2025-ին ՌԴ-ում ծաղիկների ներմուծման ծավալը կազմել է 96,2 մլն (հատ)։ ՀՀ վիճակագրական կոմիտեի տվյալներով՝ մինչ այժմ հայկական խմիչքների, սննդամթերքի և ծաղիկների արտահանման 84%-ից մինչև 98%-ն ուղղվել է ռուսական շուկա։
Կարդացեք նաև
Ծաղիկները սպասում են ընտրություններին
