Հայկական գյուղատնտեսական արտադրանքը վերջերս չի համապատասխանում Ռուսաստանի պահանջներին՝ չնայած այն հանգամանքին, որ դրանց հիմնական շուկան է, «ՌԻԱ Նովոստի»-ին հայտնել է «Ռոսսելխոզնադզորը»։
Ըստ գերատեսչության՝ Հայաստանի էկոնոմիկայի նախարարությունը չի կարողանում կատարել Գյուղատնտեսության նախարարության լուծարումից հետո իրեն վերապահված լիազորությունները։
«Հաշվի առնելով, որ Ռուսաստանը հայկական գյուղատնտեսական արտադրանքի հիմնական շուկան է, և որ Հայաստանից վերջերս ներմուծված արտադրանքը չի համապատասխանում Եվրասիական տնտեսական միության և Ռուսաստանի բուսասանիտարական պահանջներին, կարելի է ենթադրել, որ ՀՀ էկոնոմիկայի նախարարությունը չի կարողանում կատարել Գյուղատնտեսության նախարարության լուծարումից հետո իրեն վերապահված լիազորությունները»,- ասվում է հաղորդագրության մեջ։
Այսօր ավելի վաղ «Ռոսսելխոզնադզորը» հայտնել էր, որ Ռուսաստանը մայիսի 30-ից կսահմանափակի Հայաստանից մրգերի և բանջարեղենի ներմուծումը։
Մոսկվայից հնչող կոշտ քննադատության ֆոնին ՌԴ-ն սահմանափակել էր ՀՀ-ից մի շարք ապրանքների ներմուծումը։ «Ռոսսելխոզնադզորը» հայտնել էր, որ մայիսի 22-ից ժամանակավոր սահմանափակումներ է մտցնում Հայաստանից ծաղիկների ներկրման նկատմամբ, կասեցվել էր «Ջերմուկ» հանքային ջրի բոլոր խմբաքանակների ներմուծումը։
Ավելի ուշ կասեցվել էր նաև Հայաստանից ներկրված ալկոհոլային արտադրանքի առանձին խմբաքանակների իրացումը, ինչպես նաև ՌԴ ներկրվող հայկական ելակը հետ էր ուղարկվել Բագրատաշենի անցակետից։
