Իրավաբանը, ում Ալեքսանդր Երմակովի հարազատներն ուղարկել էին Երևան, չի կարողացել հանդիպել կալանավորվածին, հուլիսի 17-ին «ՌԻԱ Նովոստի»-ին հայտնել է ձերբակալվածի եղբայրը: Նրա խոսքով՝ ընտանիքը ծանոթների միջոցով կապ է հաստատել հինգ-վեց փաստաբանի, որոնումները շարունակվում են։
Օմսկի բնակիչ Ալեքսանդր Երմակովին, ով կնոջ հետ արձակուրդ էր եկել Հայաստան, ձերբակալել էին հունիսին «Զվարթնոց» օդանավակայանում, հուլիսի 16 հայտնել էին Armenia Today-ին։ Հարազատների պնդմամբ՝ նրան շփոթել են իր համանուն-անվանակցի հետ՝ հաքերի, ում փնտրում են ավստրալիական Medibank ապահովագրական ընկերության տվյալների բազայի կոտրման համար, որի հետևանքով արտահոսել էին 9,7 միլիոն մարդու տվյալներ։ Տղամարդկանց հայրանունները չեն համընկնում։
Երմակովի եղբայրը նաև հայտարարել է, որ ԱՄՆ-ում ձերբակալման օրդերը տրվել է Երևանի օդանավակայանում ռուսաստանցու ձերբակալումից մեկ օր առաջ, թեև հանցագործությունները, որոնցում նրան մեղադրում են, իբր կատարվել են 2019–2021 թվականներին: Հարազատներն մտավախություն ունեն, որ ԱՄՆ արտահանձնման հարցումը կբավարարվի։ Երմակովի պաշտպանական կողմը դիմումներ է ուղարկել Ռուսաստանի Քննչական կոմիտե, Գլխավոր դատախազություն և ԱԳՆ՝ խնդրելով աջակցել նրա ազատ արձակմանը, ավելի վաղ հայտնել էր փաստաբան Դիլան Ռաջավին։
Միևնույն ժամանակ, «Իզվեստիա»-ի տվյալներով, որոնվող Երմակովը 2024 թվականին Մոսկվայում դատապարտվել էր վնասակար ծրագրերի գործով, նրան արգելվել էր երկու տարով լքել Ռուսաստանի տարածքը։ ՌԴ դեսպանատունը հյուպատոսական տեսակցություն է հայցել ձերբակալվածի հետ, «Բազա»-ին հայտնել էր ԱԳՆ ներկայացուցիչ Մարիա Զախարովան։
