Ադրբեջանը 4,6 մլրդ դոլար արժողությամբ պայմանագրի շրջանակներում Պակիստանից JF-17 կործանիչների գնման պատվերը 16-ից հասցրել է 40 ինքնաթիռի, գրում է Forbes-ը՝ հղում անելով Պակիստանի կառավարության հաղորդագրությանը:
Մայիսի վերջին պայմանագրի ընդլայնման մասին, որն ի սկզբանե նախատեսում էր 1,6 մլրդ դոլարով ինքնաթիռների գնում, հայտնել էին ադրբեջանական ԶԼՄ-ները: Բաքուն կործանիչներ ձեռք բերելու մասին հայտնել էր 2024 թվականի սեպտեմբերին։ Նշվում է, որ խոսքը վերաբերում է ինքնաթիռի վերջին տարբերակի՝ JF-17C Block III-ի գնման մասին, որը համալրված է ակտիվ ֆազավորված ալեհավաքային ցանցով (Աֆար) ռադարով և ժամանակակից 4,5 սերնդի ինքնաթիռների համար նախատեսված այլ համակարգերով ու սպառազինությամբ:
RANE ընկերության փորձագետ Սեմ Լիխտենշտեյնը պարբերականին ասել է, որ Ադրբեջանի համար JF-17-ը նախ և առաջ տնտեսապես ավելի շահավետ տարբերակ է՝ համեմատած մրցակից արևմտյան կամ ռուսական տարբերակների հետ: Բացի այդ, նման ինքնաթիռների ավելի մեծ քանակության ձեռքբերումը կօգնի Ադրբեջանին արդիականացնել խորհրդային արտադրության հին և պակաս արդյունավետ ինքնաթիռները:
Նշվում է, որ կործանիչների գնումն Ադրբեջանի ռազմաօդային ուժերի համար զգալի արդիականացում է՝ ինչպես քանակական, այնպես էլ որակական առումով, քանի որ Ադրբեջանը մինչ այժմ ապավինում էր հնացած МиГ-29 կործանիչներին և Су-25 գրոհիչներին: Բացի այդ, JF -17-ը համատեղելի է մի շարք թուրքական համակարգերի հետ, որոնք արդեն առկա են Ադրբեջանի սպառազինության մեջ, ինչն էլ ավելի գրավիչ է դարձնում այս կործանիչը Բաքվի համար:
Մեկնաբանելով Հայաստանի հնարավոր պատասխան քայլերը՝ Լիխտենշտեյնը պարբերականին ասել է, որ Երևանը, հավանաբար, կօգտագործի իր աճող պաշտպանական գործընկերությունը Ֆրանսիայի, Հնդկաստանի և Իրանի հետ, ինչպես նաև Ռուսաստանի հետ լարվածությունը նվազեցնելու շարունակական փորձերը՝ Ադրբեջանի ռազմական գերիշխանությանը հակազդելու համար:
Ընդ որում՝ պարբերականը նշում է, որ JF-17-ի գնումներից հետո Ադրբեջանը կունենա տասն անգամ ավելի շատ կործանիչներ, քան Հայաստանը, և դա նույնիսկ առանց հաշվի առնելու Ադրբեջանի ՌՕՈւ սպառազինության մեջ առկա МиГ-29 կործանիչները կամ ժամանակակից իսրայելական ու թուրքական անօդաչուների զինանոցը:
Հայաստանի զինված ուժերի սպառազինության մեջ ներկայումս ընդգրկված է 2019 թվականին Ռուսաստանից գնված 4 Су30СМ կործանիչ: Փորձագետի խոսքով՝ Երևանն այս պայմաններում, ամենայն հավանականությամբ, կկենտրոնանա Հնդկաստանի կողմից լիցենզիայով արտադրվող Су-30МКИ կործանիչների ձեռքբերման վրա:
Նրա խոսքով՝ այս տիպի ինքնաթիռներն ավելի շահավետ են «արժեք-արդյունավետություն» սկզբունքի տեսանկյունից, քան ֆրանսիական Rafale կործանիչները: Երևանի հաշվարկների վրա կարող են ազդել նաև Հնդկաստանի և Պակիստանի վերջին հակամարտության ընթացքում Rafale-ի ցածր արդյունավետության մասին հաղորդագրությունները:
Բացի դրանից, Հնդկաստանը կարող է արդիականացնել Հայաստանի արդեն իսկ ունեցած Су30СМ կործանիչները՝ ապահովելով դրանց համատեղելիությունը հնդկական արտադրության սպառազինության հետ։ Լիխտենշտեյնի գնահատմամբ՝ բացի նոր կործանիչներ ձեռք բերելուց, Հայաստանը, հավանաբար, նաև ձգտում է արդիականացնել իր հակաօդային պաշտպանությունը Հնդկաստանից, Իրանից և այլ երկրներից ՀՕՊ համակարգեր ձեռք բերելու միջոցով:
