Երուսաղեմի Հայոց պատրիարքարանի հոգևորականների ժողովը կոչ է արել գումարել Ազգային եկեղեցական խորհուրդ՝ ՀԱԵ շուրջ ստեղծված իրավիճակը լուծելու համար։
Նրանք լիակատար աջակցություն ու նվիրում են հայտնել Մայր Աթոռ Սուրբ Էջմիածնին և Ամենայն Հայոց կաթողիկոս Գարեգին Երկրորդին՝ հավելելով, որ պատարագների ժամանակ վեհափառի անունը հիշատակելը նույն ժողովի իրավական պահանջն է:
«Հայոց Առաքելական եկեղեցին, համաձայն ՀՀ սահմանադրության, ինքնակառավարվող հաստատություն է և անջատ պետությունից: Ներկա կառավարության միջամտությունը եկեղեցու գործունեությանը հակասում է սահմանադրական կարգին»,- ասվում է հայտարարության մեջ։
Նշելով, որ ՀԱԵ-ին վերաբերող հարցերը պետք է լուծվեն եկեղեցական կանոններին համապատասխան, ժողովը խնդրել է կաթողիկոսին գումարել Ազգային եկեղեցական խորհուրդ՝ եկեղեցու և նրա առաջնորդի շուրջ ստեղծված իրավիճակը լուծելու համար։
ՀՀ վարչապետ Նիկոլ Փաշինյանն ամիսներ է՝ պահանջում է կաթողիկոսի հրաժարականը՝ հայտարարելով, որ նա զավակ ունի և խախտել է կուսակրոնության ուխտը։ Փաշինյանն այս փուլում մասնակցում է պատարագների, որոնց ժամանակ զեղչվում է կաթողիկոսի անունը։ Նա հաստատել էր, որ պատարագներից առաջ նաև Ազգային անվտանգության ծառայությունն է միջնորդում չհնչեցնել կաթողիկոսի անունը։ Վեհափառի անունը զեղչվել էր նաև Գյումրիի «Յոթ Վերք» եկեղեցում մատուցված պատարագին:
Ավելի վաղ հայտնի էր դարձել, որ դեկտեմբերի 10-12-ին նախատեսված Հայ Առաքելական եկեղեցու եպիսկոպոսների համագումարը ժամանակավորապես հետաձգվել է։
