ԱՄՆ նախագահ Դոնալդ Թրամփի խաղաղության ծրագիրը պարունակում է 28 կետ, այն հրապարակել է ուկրաինացի պատգամավոր Ալեքսեյ Գոնչարենկոն։
Նշվում է, որ առաջարկները վերաբերում են տարածքային հարցերին, վերականգնմանը և Ուկրաինայի քաղաքական կարգավիճակին։
Ըստ Ուկրաինայի անվտանգության և քաղաքական կարգավիճակի վերաբերյալ կետերի՝ կհաստատվի Ուկրաինայի ինքնիշխանությունը, Միացյալ Նահանգները կտրամադրի պայմանական անվտանգության երաշխիքներ, Սահմանադրությամբ կամրագրվի Ուկրաինայի չեզոք կարգավիճակը և ՆԱՏՕ-ից հրաժարվելը, կսահմանափակվի Ուկրաինայի զինված ուժերի չափը, կպահպանվի երկրի ոչ միջուկային կարգավիճակը։
Տարածքային հարցերի շրջանակներում Ղրիմը, Դոնեցկը և Լուգանսկը դե ֆակտո կճանաչվեն որպես Ռուսաստանի տարածքներ, իսկ Խերսոնը և Զապորոժիեն շփման գծի երկայնքով կստանան «սառեցված կարգավիճակ»։ Թրամփը նաև առաջարկում է ստեղծել ապառազմականացված բուֆերային գոտի՝ փաստացի Ռուսաստանի վերահսկողության ներքո, որտեղ երկու կողմն էլ պարտավորվում են չփոխել սահմաններն ուժով։
Ռազմական համաձայնագրերը, ըստ ծրագրի, ներառում են Ուկրաինայում ՆԱՏՕ-ի զորքերի և Լեհաստանում ՆԱՏՕ-ի կործանիչների տեղակայման արգելք։ Այն առաջարկում է ստեղծել ԱՄՆ-Ռուսաստան անվտանգության աշխատանքային խումբ և Ռուսաստանի չհարձակման քաղաքականության իրավական կոդիֆիկացիա։
Ուկրաինայի տնտեսությանը և վերակառուցմանը վերաբերող հարցերը ներառում են Ուկրաինայի վերակառուցման համար ներդրումային փաթեթ ստեղծելու, ռուսական սառեցված 100 մլրդ դոլարի ակտիվների օգտագործում, որի 50%-ը կանցնի ԱՄՆ-ին, ինչպես նաև Եվրոպայից լրացուցիչ 100 մլրդ եվրոյի հատկացման և Ուկրաինայի զարգացման հիմնադրամի ստեղծման դրույթներ։
Ռուսաստանի դիրքն աշխարհում կարգավորող դրույթները ներառում են պատժամիջոցների աստիճանական վերացում, երկրի վերադարձ «Մեծ ութնյակ» և ԱՄՆ-ի հետ երկարաժամկետ տնտեսական համագործակցություն։
Մարդասիրական հարցերը ներառում են «բոլորը բոլորի դիմաց» գերիների փոխանակում, ընտանիքների վերամիավորում և կրթության ոլորտում հանդուրժողականության ծրագրեր։
Թրամփի ծրագիրը ներառում է նաև էներգետիկայի և հատուկ օբյեկտների վերաբերյալ դրույթներ: Դրանք նախատեսում են Զապորոժիեի ատոմակայանի գործարկումը ՄԱԳԱՏԷ-ի հսկողության ներքո, որտեղ էլեկտրաէներգիան կբաժանվի 50/50 Ռուսաստանի և Ուկրաինայի միջև, ինչպես նաև ԱՄՆ օգնությունն Ուկրաինայի գազային ենթակառուցվածքների վերականգնման գործում։
Ուկրաինայի ներքաղաքական գործընթացի շրջանակներում խաղաղության ծրագրի ստորագրումից 100 օր անց կանցկացվեն ընտրություններ, ինչպես նաև հակամարտության բոլոր կողմերի համար կտրամադրվի լիակատար համաներում։
Խաղաղության ծրագրի դրույթների իրականացումը կհսկվի իրավաբանորեն պարտավորեցնող համաձայնագրով և Թրամփի գլխավորած «Խաղաղության խորհրդի» կողմից: Ծրագիրը նախատեսում է համաձայնագրի ստորագրումից հետո անհապաղ հրադադար և պատժամիջոցներ խաղաղության ծրագրի խախտումների դեպքում։
ԱՄՆ պետքարտուղար Մարկո Ռուբիոն մտադիր է նոյեմբերի 21-ին եվրոպացի պաշտոնյաների հետ քննարկել Ուկրաինայի հակամարտության խաղաղ կարգավորման ԱՄՆ նոր ծրագիրը:
