Խոսքի ազատության հիմնարար իրավունքի խախտման հարցը վերջին հինգ ամիսներին դարձել է հանրային քննարկման առարկա՝ «Տաշիր» խմբի ղեկավար Սամվել Կարապետյանի կալանավորումից և ընդդիմադիր հայացքներ ունեցող քաղաքացիների դեմ հարուցված գործերի ֆոնին։ Իրավապաշտպանները նշում են, որ կալանքը որպես խափանման միջոց չպետք է կիրառվի սոցիալական ցանցերում հնչեցված կարծիքների համար, եթե դրանք չեն պարունակում սպառնալիքներ կամ ատելության դրսևորումներ, ինչպես փաստաբան Ալեքսանդր Կոչուբաևի և Կարապետյանի դեպքում։
Խոսքի ազատության պաշտպանության կոմիտեն 2025 թվականի երրորդ եռամսյակում արձանագրել է լրագրողների նկատմամբ ֆիզիկական բռնության մեկ, տեղեկատվություն ստանալու իրավունքի խախտման 23 և տարբեր ձևի ճնշումների 19 դեպք։
Freedom House-ի և Reporters Without Borders-ի վերջին զեկույցներում Հայաստանը շարունակում է դասվել այն երկրների շարքին, որտեղ մամուլի ազատությունը գնահատվում է որպես «մասամբ ազատ» և «բևեռացված»: Զեկույցներում նշվում է, որ լրագրողների նկատմամբ վերաբերմունքը հաճախ պայմանավորված է նրանց հարցերի բովանդակությամբ և քաղաքական ենթատեքստով, իսկ տեղեկատվության հասանելիությունը որոշ դեպքերում սահմանափակվում է պետական կառույցների կողմից։
Armenia Today-ը քաղաքացիներից հետաքրքրվել է՝ ըստ իրենց՝ Հայաստանում խոսքի ազատություն կա՞, վստահո՞ւմ են լրատվամիջոցներին և ո՞ր աղբյուրներից են ստանում ամենահավաստի տեղեկատվությունը։
Հարցվածների մի մասն ասել է, որ Հայաստանում խոսքի ազատություն չկա, իսկ լրատվամիջոցներին չեն հավատում:
«Հավատ չեն թողել, ինչի՞ն հավատանք։ Հավատ կա՞ Հայաստանում»,- ասել է քաղաքացին։
Մեկ այլ քաղաքացի նշել է, որ չհավատալու պատճառը ղեկավարներն են։ «Երկիրը փչացնում են, Լևոնից սկսած՝ մինչև հիմա»։
Հարցման մյուս մասնակիցը խոսքի ազատության սահմանափակման մեջ մեղադրել է գործող իշխանություններին:
«Նիկոլի օրոք ի՞նչ խոսքի ազատություն։ Ոչ մի լրատվամիջոցի չեմ վստահում, չեմ նայում։ Հավաստի տեղեկություն չկա»,- հավելել է նա։
Կային քաղաքացիներ, որոնք ասել են, որ այսօր Հայաստանում ավելի լավ է, քան անցյալում էր, քանի որ խոսքի ազատություն նկատում են։
«Ո՞նց, բա որտե՞ղ կա, Վրաստանո՞ւմ, թե՞ Թուրքիայում։ Խնդրեմ, Նիկոլ Փաշինյանը բերեց խոսքի ազատությունը, մեռնեմ իր կյանքին, Նիկոլի ցավը տանեմ»,- պատասխանել է հարցման մասնակիցը։
Մանրամասները՝ տեսանյութում։
