Արցախի նախկին պետնախարար Ռուբեն Վարդանյանի գերեվարման և Բաքվում կալանավորման երկրորդ տարելիցի օրը նրա որդին՝ Դավիթ Վարդանյանը, անդրադարձել է հոր կալանքի պայմաններին, Ադրբեջանում Կարմիր խաչի գործունեության դադարեցմանը, 23 հայ գերիների ճակատագրին և միջազգային հանրության լռությանը։
«Սիվիլնեթին» տված հարցազրույցում նա նշել է, որ շատ քիչ տեղեկություններ ունի հոր պահման պայմանների մասին՝ հատկապես հիմա, երբ Կարմիր խաչն այլևս չի աշխատում Ադրբեջանում։
«Այն, ինչ գիտենք, հայրս իր բանտախցում մենակ է։ Նրա առողջական վիճակի մասին ստույգ ոչինչ չգիտենք։ Ըստ նրա՝ լավ է և մեզ հորդորում է չանհանգստանալ, բայց հասկանում ենք, որ նա դա կասեր ցանկացած պարագայում։ Կարծում եմ՝ նրա համար շատ ավելի կարևոր են ոչ թե բանտարկության պայմանները, այլ իր և մյուս 22 քրիստոնյա հայ գերիների ձերբակալության պատճառները»,- պարզաբանել է Դավիթը։
Նա կոչ է արել համախմբվել՝ մի կողմ դնելով ցանկացած տարաձայնություն, լծվել հայ գերիներին վերադարձնելու գործին։
«Այն, ինչ հրապարակայնորեն ասվեց Վաշինգտոնում այս օգոստոսին, անշուշտ, բավարար չէր թե՛ մեզ, թե՛, կարծում եմ, ամբողջ հայության համար։ Մենք չենք կարող հասնել իրական խաղաղության՝ առանց հայ քրիստոնյաների ազատման։ Միևնույն ժամանակ՝ բավականին ուշագրավ է այն, ինչ տեղի է ունենում հետնաբեմում և, կարծում եմ, պետք է ավելին անենք՝ այս օրակարգն առաջ մղելու համար»,- շեշտել է Վարդանյանը։
Նրա խոսքով՝ ի տարբերություն միջազգային այլ դերկատարների, ԱՄՆ նախագահ Դոնալդ Թրամփի թիմը պատրաստակամ է, լսում է և փորձում օգնել։
«Թրամփի թիմը կարծես ավելի պատրաստակամ է լուծել 23 հայ քրիստոնյա գերիների հարցը։ ՄԱԿ-ում Թրամփը հստակ նշեց, որ քրիստոնյաներն աշխարհում ամենահալածվող կրոնական համայնքն են, և նա պայքարելու է դրա համար»,- նշել է Վարդանյանը։
Նրա կարծիքով՝ հայերն ունեն ՏՏ և տեխնոլոգիական նորարարություններ, հայերն աշխարհում քրիստոնեական ամենահին երկիրն են, ինչը եզակի համակցություն է տարածաշրջանի համար։
Ադրբեջանում, պաշտոնական տվյալներով, 23 հայ գերի կա։ Հունվարի 17-ին սկսվել էին Արցախի ռազմաքաղաքական առաջնորդների դատավարությունները: Նրանք մեղադրվում են 2548 դրվագով։
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, նախկին պետնախարար Ռուբեն Վարդանյանը, ԱԺ նախկին նախագահ Դավիթ Իշխանյանը, նախկին արտգործնախարար Դավիթ Բաբայանը, Պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
