Փաստաբան Էրիկ Բեգլարյանը հայտնել է, որ նախօրեին՝ օգոստոսի 28-ին, Արմավիր քրեակատարողական հիմնարկում մահացել է իր պաշտպանյալը՝ Արցախից բռնի տեղահանված Արտաշես Վարդանյանը։
Փաստաբանը նշել է, որ Վարդանյանը երկար ժամանակ բողոքում էր իր առողջական վիճակի վատթարացման մասին, սակայն «այդ բողոքներին համապատասխան կերպով չէին արձագանքում»։
«Չնայած բազմաթիվ բողոքներին՝ նրան չէին տեղափոխում հիվանդանոց կամ բժշկական մասնագիտացված հաստատություն՝ պատշաճ բժշկական օգնություն ստանալու նպատակով։ Բողոքների անտեսումը և համապատասխան արձագանքի բացակայությունը, ըստ ամենայնի, հանգեցրել են այն ողբերգական արդյունքին, որի մասին ստիպված եմ այսօր տեղեկացնել»,- գրել է նա։
Փաստաբանը դիմել է Գլխավոր դատախազին և Մարդու իրավունքների պաշտպանին՝ խնդրելով նրանց ուղղակի և լիարժեք քննություն անցկացնել Վարդանյանի մահվան պատճառների վերաբերյալ, պարզել, թե արդյոք քրեակատարողական հիմնարկի պատասխանատու աշխատակիցների կողմից եղե՞լ են անգործության դեպքեր, անփութություն կամ իրավական պարտականությունների չկատարում։
«Եվ ամենակարևորը՝ տալ իրավական հստակ գնահատական նրանց գործողություններին կամ անգործությանը»,- նշել է նա։
