Երուսաղեմի հայկական հաստատությունները և «Փրկել ԱՌՔ»-ն (Save The ArQ) ահազանգում են Երուսաղեմի Հին քաղաքի Հայոց թաղամասի շուրջ «վտանգավոր գործարքի» կնքման մասին Xana Capital-ի և Հայոց պատրիարքարանի միջև, նշված է նրանց հայտարարության մեջ:
«Այս նոր գործարքը, որը գաղտնի բանակցվել է և միայն մասամբ է բացահայտվել, առաջին անօրինական պայմանագրից էլ ավելի վտանգավոր է և պահանջում է, որ համայնքը հետ վերցնի իր գործը»,- հայտնում են Երուսաղեմի հայկական կառույցները:
Խոսքը Հայոց պատրիարքարանի և իսրայելական Xana Capital ընկերության միջև Հին քաղաքի հայկական թաղամասի «Կովերի այգի» հողամասի վարձակալության պայմանագրի մասին է: Երուսաղեմի հայ համայնքը 2024թ. փետրվարին հայց էր ներկայացրել դատարան՝ անվավեր ճանաչելու վարձակալության պայմանագիրը:
«Վերջին երկու տարիների ընթացքում Երուսաղեմի հայկական համայնքը միավորվել է՝ պայքարելով անօրինական և խաբեբա հողային գործարքի դեմ, որի նպատակն էր 98 տարի ժամկետով Xana Gardens ընկերությանը հանձնել պատմական «Կովերի այգի» հողատարածքը։ Արդյունքում, ինչպես Երուսաղեմի Հայոց պատրիարքությունը, այնպես էլ համայնքը, նախաձեռնել են առանձին իրավական գործընթացներ՝ չեղյալ հայտարարել այդ ամոթալի համաձայնագիրը, որն ստորագրվել էր 2021 թվականին առանց լիազորության՝ խախտելով մեր հողերը հայ քրիստոնյա եղբայրությանը և ժողովրդին կապող սուրբ վստահությունը»,- ասված է հայտարարության մեջ։
Հիմա, ըստ հայկական հաստատությունների և Save ARQ-ի, տեղեկություններ կան, որ պատրիարքությունը պատրաստվում է գաղտնի առաջ շարժվել՝ ընդդեմ համայնքի շահերի: Հայտարարության հեղինակները մերժում են այդ համաձայնագիրը, որը վերաբերում է մոտ 7200 քառակուսի մետր հողատարածքին։
«Պատրիարքությունը կրկին դուրս է թողել իր ժողովրդին և եղբայրությանը։ Ոչ մի նախագիծ չի ներկայացվել, ոչ մի խորհրդակցություն տեղի չի ունեցել, համայնքին չի տրվել հնարավորություն հասկանալու պայմանները կամ ներկայացնելու իր դիրքորոշումը մինչև վերջնականացմանն անցնելը։ Պատրիարքության այս լռությունը ընթացակարգային չէ: Այս պահը ոչ միայն իրավական է, այլև հոգևոր։ Այն պահանջում է պարզություն, համարձակություն և ազնվություն։ «Կովերի այգին» վաճառքի համար չէ, վարձակալության տալու՝ նույնպես»,- ասված է հայտարարության մեջ:
2023 թվականի դեկտեմբերի 28-ին շուրջ 30 սադրիչ հարձակվել էր «Կովերի պարտեզում» գտնվող հայերի վրա։ Երուսաղեմի Հայոց պատրիարքարանը հայտարարել էր, որ նրանք ղեկավարվում են տարածքի նկատմամբ հավակնություններ ունեցող Xana Capital ընկերության կողմից։
2023 թվականի հունվարին Երուսաղեմում հրեա արմատականները հարձակվել էին հայերի վրա և փորձել պոկել Հայ Առաքելական եկեղեցու Երուսաղեմի պատրիարքարանի շենքի դրոշները։ Նույն տարվա հունվարի 27-ին հրեա ծայրահեղականները սադրել էին Երուսաղեմի Taboon Wine Bar հայկական ռեստորանի աշխատակիցներին ու այցելուներին։
2024-ի սեպտեմբերին Xana Gardens ընկերությունը, որը հավակնում է Երուսաղեմի Հին քաղաքի հայկական թաղամասի «Կովերի պարտեզ» հողամասին, հայց էր ներկայացրել թաղամասի փրկության շարժման համահիմնադիրներ Հակոբ Ջերնազյանի և Սեթրագ Բալյանի դեմ։
