Այսօր ժամը 11:46-ից սկսած՝ ArCa համակարգում ծառայությունները ժամանակավորապես անհասանելի են, հայտնում է վճարային համակարգի մամուլի ծառայությունը։
Նշվում է, որ կատարվում են համակարգի տեխնիկական վերազինման և բարելավման աշխատանքներ։
«Մեր մասնագետները ներդնում են բոլոր ջանքերը, որպեսզի համակարգը վերականգնվի հնարավորինս շուտ»,- ասվում է հաղորդագրությունում։
Հուլիսի 23-ին ArCa համակարգում համատարած խափանումներ էին փոխանցումներ, կանխիկացում ու վճարումներ կատարելու գործարքներում։ Armenia Today-ին ArCa համակարգի զանգերի կենտրոնից հայտնել էին, որ հարթակը թարմացվում է։ Խնդիրը կարգավորվել էր ժամը 17:05-ին։
Armenian Card-ը (Հայկական քարտ) ազգային վճարային համակարգ է, որի միջոցով մշակվում են բոլոր ներհանրապետական քարտային գործարքները: Հարթակը միավորում է Հայաստանի գրեթե բոլոր բանկերը:
