Իրանը պաշտոնապես հայտարարել է Ատոմային էներգիայի միջազգային գործակալության (ՄԱԳԱՏԷ) հետ համագործակցությունը դադարեցնելու մասին, հայտնել է Tasnim գործակալությունը։
Իրանի նախագահ Մասուդ Փեզեշքիանը հրահանգել է բոլոր վարչական կազմակերպություններին կատարել գործակալության հետ համագործակցությունը դադարեցնելու մասին ԻՀՀ խորհրդարանի պահանջը: Նշվում է, որ Իրանի խորհրդարանն օրինագիծը վավերացրել է սահմանադրական խորհրդի կողմից ընդունվելուց հետո։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ԱՄՆ-ն հունիսի 22-ի գիշերը հարվածներ էր հասցրել Իրանի երեք միջուկային օբյեկտի։ Հունիսի 23-ի ուշ երեկոյան Իրանը հրթիռներ էր արձակել Կատարում տեղակայված ամերիկյան ռազմաբազաների ուղղությամբ։
Հունիսի 24-ին ԱՄՆ նախագահ Դոնալդ Թրամփը հայտարարել էր, որ Իրանը կհամաձայնի դադարեցնել հակամարտությունը, և պատրաստ է Իսրայելին խաղաղության կոչով դիմել: Նույն օրը Թրամփը հայտնել էր, որ Իրանի և Իսրայելի միջև հրադադարն ուժի մեջ է մտել։
Իրանի խորհրդարանը հունիսի 25-ին ՄԱԳԱՏԷ-ի հետ համագործակցությունը կասեցնելու մասին օրինագիծ էր ընդունել, հունիսի 26-ին Իրանի նախագահը կարգադրել էր ի կատար ածել օրենքը:
