ՀՀ վարչապետ Նիկոլ Փաշինյանը պնդելով, որ Ամենայն Հայոց կաթողիկոս Գարեգին Բ-ն խախտել է իր իսկ կողմից կամավորությամբ ստանձնած կուսակրոնության ուխտը և զավակ ունի, կոչ է արել համախմբվել նոր կաթողիկոսի ընտրության շուրջ, գրել է նա սոցիալական ցանցերում:
«Սա փաստ է, և եթե Գարեգին Բ-ն փորձի հերքել, անհրաժեշտ ձևաչափով դա կապացուցեմ»,- շեշտել է երկրի ղեկավարը։
Հիշատակելով Հայ Առաքելական եկեղեցու կանոնակարգը՝ վարչապետը նշել է. «Գարեգին Բ-ն չէր կարող լինել եպիսկոպոս, արքեպիսկոպոս, չէր կարող ընտրվել և չի կարող լինել կաթողիկոս․ Կտրիճ Ներսիսյանը պետք է ազատի Վեհարանը»։
Փաշինյանը հայտարարել է, որ հայ եկեղեցին պետք է ունենա նորընտիր կաթողիկոս, ում «բարեվարքությունը կաթողիկոսական ընտրություններից առաջ ստուգված և հաստատված կլինի»։
«Հայաստանյայց Առաքելական Սուրբ եկեղեցու հավատավոր հետևորդներին կոչ եմ անում համախմբվել Վեհարանը սիրով և քրիստոնեաբար ազատելու և որևէ իրապես սրբազան հոգևորականի Ամենայն Հայոց կաթողիկոս ընտրելու օրակարգի շուրջ»,- նշել է նա։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։
