Իրանն ու ԱՄՆ-ն Հռոմում անցկացրել են Թեհրանի միջուկային ծրագրի շուրջ բանակցությունների հինգերորդ փուլը, հայտնում է ՏԱՍՍ-ը։
Խորհրդակցությունները տևել են շուրջ 3 ժամ։ Իրանի ԱԳ նախարար Աբբաս Արաղչին բանակցությունների արդյունքներով հայտարարել է, որ «կողմերը պայմանավորվել են լրամշակել իրենց դիրքորոշումները, այնուհետև կկազմակերպեն և կանցկացնեն բանակցությունների հաջորդ փուլը»:
Նախարարը կարծիք է հայտնել, որ բանակցությունների արդյունքում «ամերիկյան կողմն սկսել է շատ ավելի լավ հասկանալ Իրանի դիրքորոշումը»:
Օմանի ԱԳ նախարար Բադր Ալ Բուսաիդին հայտարարել է, որ կողմերը հասել են «որոշակի, բայց ոչ վերջնական առաջընթացի»:
Այսօր ավելի վաղ Արաղչին մեկնել էր Հռոմ՝ մասնակցելու Իրանի և Միացյալ Նահանգների միջև բանակցությունների հինգերորդ փուլին և հայտարարել, որ եկել է որոշում կայացնելու ժամանակը։
Իրանն ու ԱՄՆ-ն ապրիլի 12-ին, 19-ին, 26-ին և մայիսի 12-ին Օմանի միջնորդությամբ բանակցությունների չորս փուլ էին անցկացրել՝ իրանական միջուկային ծրագրի շուրջ համաձայնության հասնելու և Թեհրանի նկատմամբ պատժամիջոցները չեղարկելու նպատակով:
ԱՄՆ նախագահ Դոնալդ Թրամփը մայիսի 14-ին հայտարարել էր, որ Սպիտակ տան վարչակազմը պատրաստ է առավելագույն ճնշում գործադրել Իրանի վրա և զրկել նավթ արտահանելու հնարավորությունից, եթե երկու կողմերին չհաջողվի պայմանավորվածություն ձեռք բերել Թեհրանի միջուկային ծրագրի շուրջ:
