Ռուսաստանը պատրաստ է օգնել Իրանին և Միացյալ Նահանգներին միջուկային համաձայնագրի կնքման հարցում, եթե նրանք համաձայնության գան, «ՌԻԱ Նովոստիին» ասել է Ռուսաստանի փոխարտգործնախարար Անդրեյ Ռուդենկոն։
«Մեր իրանցի գործընկերները տեղեկացրել են բանակցությունների ներկայիս փուլի մասին։ Նրանք հույս ունեն, որ կկարողանան հասնել բոլորի կողմերին համապատասխանող համաձայնության: Մենք ողջունեցինք այս վերաբերմունքը և ևս մեկ անգամ հայտարարեցինք մեր պատրաստակամության մասին, բանակցությունների բոլոր կողմերի և մասնակիցների համաձայնության դեպքում առաջարկել մեր ծառայությունները, որոնք կարող են օգնել վերջնական համաձայնության հասնելուն»,- ասել է Ռուդենկոն, որն աշխատանքային այցով գտնվում էր Թեհրանում և հանդիպումներ էր ունեցել Իրանի ԱԳՆ ներկայացուցիչների հետ:
Ռուսաստանի արտաքին գործերի նախարարության ղեկավարի տեղակալը նշել է, որ Մոսկվան հույս ունի Թեհրանի և Վաշինգտոնի միջև բանակցությունների դրական արդյունքի և «երկու կողմերին էլ բավարարող համաձայնագրերի կնքման»։ Նրա խոսքով՝ ԱՄՆ-ի և Իրանի հարաբերություններում տեղի ունեցողը կազդի նաև տարածաշրջանային իրավիճակի վրա, որը Մոսկվան կցանկանար տեսնել կայուն և անվտանգ։
Իրանն ու ԱՄՆ-ն ապրիլի 12-ին, 19-ին, 26-ին և մայիսի 12-ին Օմանի միջնորդությամբ բանակցությունների չորս փուլ էին անցկացրել՝ իրանական միջուկային ծրագրի շուրջ համաձայնության հասնելու և Թեհրանի նկատմամբ պատժամիջոցները չեղարկելու նպատակով:
ԱՄՆ նախագահ Դոնալդ Թրամփը մայիսի 14-ին հայտարարել էր, որ Սպիտակ տան վարչակազմը պատրաստ է առավելագույն ճնշում գործադրել Իրանի վրա և զրկել նավթ արտահանելու հնարավորությունից, եթե երկու կողմերին չհաջողվի պայմանավորվածություն ձեռք բերել Թեհրանի միջուկային ծրագրի շուրջ:
