Իսրայելի հանրային հեռարձակող Kan 11-ի մեկնաբանը «Եվրատեսիլ» երգի մրցույթում հայ մասնակցի ելույթից հետո ուղիղ եթերում վիրավորել է հայերին, հայտնել է Երուսաղեմի հայկական թաղամասի փրկության շարժումը։
«Չեմ կարողանում հավատալ, որ այս մարդկանց Երուսաղեմի մի ամբողջ թաղամաս տվեցինք։ Այս ներկայացումը դիտելուց հետո մենք մեզ զգում ենք փրկվածների պես»,- ասել է Kan 11-ի մեկնաբանը հայ մասնակից Պարգի (Պարգև Վարդանյան) ելույթից անմիջապես հետո։
Երուսաղեմի հայ համայնքը հայտարարությունը որակել է «անհիմն, անպատեհ, ռասիստական և վիրավորական»՝ ուղղված հին համայնքին, որը վաղուց ի վեր Երուսաղեմի պատմական, կրոնական և մշակութային կառուցվածքի անբաժանելի մասն է կազմել։
Շարժումը պահանջել է, որ Իսրայելի հանրային հեռարձակողը հրապարակավ ներողություն խնդրի Երուսաղեմի հայ համայնքից, ինչպես նաև բոլոր նրանցից, ովքեր գնահատում են հանդուրժողականության, պատմական ճշմարտության և ժողովուրդների միջև փոխադարձ հարգանքի արժեքները։
«Մենք թույլ չենք տա որևէ մեկնաբանի կամ որևէ այլ կողմի աղավաղել պատմական ճշմարտությունը կամ ոտնահարել ամբողջ համայնքի և ազգի արժանապատվությունը»,- ասվում է հայտարարության մեջ։
Շարժումը շեշտել է, որ Երուսաղեմի հայկական թաղամասը ոչ մեկին չեն «նվիրել»։ Այն կառուցվել, պահպանվել և զարգացել է դարերի ընթացքում հայ ժողովրդի կողմից, որն ավելի քան 1600 տարի շարունակ պահպանել է իր շարունակական ներկայությունը Սուրբ Երկրում և Երուսաղեմում։ Այս ներկայությունը ճանաչված է ամբողջ աշխարհում և յուրահատուկ ներդրում ունի քաղաքի հոգևոր, մշակութային և պատմական կյանքում։
«Նման հայտարարությունները ոչ միայն սխալ են, այլև վիրավորական և վտանգավոր, քանի որ վնասում են Երուսաղեմի փխրուն սոցիալական հավասարակշռությանը, նշել են ակտիվիստները։ Հայկական թաղամասը, որը Հին քաղաքի չորս թաղամասերից մեկն է, համայնքների և կրոնների միջև համակեցության, բացության և համագործակցության խորհրդանիշ է։ Երուսաղեմի հայ բնակիչները մարմնավորում են հանդուրժողականության, ուրիշների նկատմամբ հարգանքի և Երուսաղեմի դարավոր պատմական ժառանգության նկատմամբ երկյուղածության արժեքները»,- ասվում է հայտարարությունում։
2023 թվականի հունվարին Երուսաղեմում հրեա արմատականները հարձակվել էին հայերի վրա և փորձել պոկել Հայ առաքելական եկեղեցու Երուսաղեմի պատրիարքարանի շենքի դրոշները։ Նույն տարվա հունվարի 27-ին հրեա ծայրահեղականները սադրել էին Երուսաղեմի Taboon Wine Bar հայկական ռեստորանի աշխատակիցներին ու այցելուներին։
2023 թվականի դեկտեմբերի 28-ին շուրջ 30 սադրիչ հարձակվել էր «Կովերի պարտեզում» գտնվող հայերի վրա։ Երուսաղեմի Հայոց պատրիարքարանը հայտարարել էր, որ նրանք ղեկավարվում են տարածքի նկատմամբ հավակնություններ ունեցող Xana Capital ընկերության կողմից։ Հարձակման հետևանքով վիրավորվել էին հոգևորականներ, հայկական աստվածաբանական ակադեմիայի ուսանողներ և տեղի բնակիչներ: 2024-ի ապրիլի 3-ին մի խումբ հրեա վերաբնակիչներ՝ ավելի քան 20 իսրայելցի ոստիկանի ուղեկցությամբ, ներխուժել էին այդ տարածք։
2024-ի սեպտեմբերին Xana Gardens ընկերությունը, որը հավակնում է Երուսաղեմի Հին քաղաքի հայկական թաղամասի «Կովերի պարտեզ» հողամասին, հայց էր ներկայացրել թաղամասի փրկության շարժման համահիմնադիրներ Հակոբ Ջերնազյանի և Սեթրագ Բալյանի դեմ։
Մայիսի 15-ին Հայաստանը դուրս էր եկել «Եվրատեսիլ 2025» երգի մրցույթի եզրափակիչ, որը տեղի կունենա Շվեյցարիայի Բազել քաղաքում։ Երկիրը ներկայացնում է երգիչ Պարգը՝ Survivor երգով։ Մրցույթի եզրափակիչը կկայանա մայիսի 17-ին։
