Կապանի քաղաքապետ Գևորգ Փարսյանը կբողոքարկի Կառուպցիայի կանխարգելման հանձնաժողովի վարույթով իր հանդեպ կիրառված նվազագույն աշխատավարձի երեքհարյուրապատիկի (300 000 դրամ) չափով տուգանքը, Armenia Today-ին հայտնեց ինքը՝ Փարսյանը։
Նա ասաց, որ վարչական դատարանում տուգանքը կբողոքարկեն սահմանված ժամկետներում, սակայն կոնկրետ երբ՝ չնշեց: Փարսյանը նաև տեղեկացրեց, որ դատարանի որոշման մասին ծանուցվել է մոտ 2 ամիս առաջ։
«Ժողովուրդ» օրաթերթը գրել էր, որ ԿԿՀ-ն վարույթ էր հարուցել Փարսյանի նկատմամբ։ Հանձնաժողովը պարզել էր, որ նա 2024 թվականի մայիսի 14-ին Կապանի համայնքապետարանի կարիքների համար կնքել է մեքենաների տեխսպասարկման ծառայությունների մատուցման պայմանագիր «Գրիգ Բիզնես» ՍՊ ընկերության հետ, որի 100% բաժնեմասնակիցը վերջինիս փոխկապակցված անձ է՝ եղբայրը՝ Գրիգոր Փարսյանը։
Վարույթի համաձայն՝ համայնքապետը կատարել է գործողություն, որն առերևույթ հանգեցրել է կամ կարող էր հանգեցնել շահերի բախման իրավիճակի առաջացման։ Նշվում է, որ համայնքային քաղաքական պաշտոն զբաղեցնող անձը դրա վերաբերյալ «Հանրային ծառայության մասին» օրենքով սահմանված կարգով 10-օրյա ժամկետում գրավոր հայտարարություն չի ներկայացրել հանձնաժողով՝ թույլ տալով «Հանրային ծառայության մասին» օրենքի 33-րդ հոդվածի 7-րդ մասի պահանջի առերևույթ խախտում։
2024 թվականի սեպտեմբերի 24-ին ԶԼՄ-ն տեղեկացրել էր, որ իրավապահները Կապանի քաղաքապետարանից առգրավել էին քաղաքապետարանի և քաղաքապետի հոր՝ «Նորոգշինի» ընկերության սուբվենցիաների հետ կապված ֆինանսական փաստաթղթերը։ Ուժայինների գործողությունները թերթը բացատրել էր Սյունիքում «ջերմ ընդունելությամբ», որը Փարսյանը դրանից մի քանի ամիս առաջ ցուցաբերել էր ընդդիմության առաջնորդ Բագրատ արքեպիսկոպոս Գալստանյանին։
