Կքննարկենք վարչապետի իմփիչմենթի գործընթացն ինքներս սկսելու հարցը, Armenia Today-ին տված հարցազրույցում հայտնել է ԱԺ անկախ պատգամավոր Հովիկ Աղազարյանը։
Ըստ պատգամավորի՝ թեև նախապես հայտարարել էր, որ գործըննթացին չի միանա, քանի որ, հնարավոր է, նախաձեռնությունն սկսի խորհրդարանական ընդդիմությունը, իսկ իրենք հրաժարվում են մասնակցել Սերժ Սարգսյան-Ռոբերտ Քոչարյան ուժերի գործընթացին, սակայն «Արթուն ենք» շարժման նամակներին ծանոթանալով՝ որոշել են քննարկել նախաձեռնություն սկսելու մասին։
«Մենք հայտարարել ենք, որ եթե այդ իմփիչմենթը նախաձեռնի «Հայաստան» կամ «Պատիվ ունեմ» դաշինքը, մենք չենք միանա։ Հիմա մեր շարքերի նախաձեռնությամբ վարչությունում ուրբաթ օրը պետք է քննարկենք իմփիչմենթի գործընթացը մեր կողմից նախաձեռնելու հարցը»,- պարզաբանեց Աղազարյանը։
Ըստ նրա՝ այն ուժերի հետ, որոնց հետ պատրաստ են համագործակցել, փորձում են լայն կոնսոլիդացիա ստեղծել և դրանով գնալ ընտրությունների։
«Այդ կոնսոլիադացիայի նպատակը պետք է լինի քաղաքական դաշտից, ինչքան ժողովուրդը մեզ կաջակցի, հնարավորինս շուտ հեռացնել և՛ Քոչարյան-Սանգսյան առանցքը, և՛ ՔՊ-ն»,- նշեց պատգամավորը։
Ըստ Աղազարյանի՝ իշխանական ու ընդդիմադիր ուժերն «իրար պահում են», հավասարակշռում իրար՝ ապահովելով մեկը մյուսի գոյությունը։
«Այդ հավասարակշռությունը շատ թույլ է, և դրա խախտելը այդքան դժվար չի լինի»,- նշեց պատգամավորը։
Ապրիլի 28-ին «Արթուն ենք» շարժումը նամակներ էր փոխանցել ԱԺ պատգամավորներին՝ Փաշինյանին անվստահություն հայտնելու գործընթացի առաջարկով։ ԱԺ անկախ պատգամավորներ Հովիկ Աղազարյանը, Հակոբ Ասլանյանն ու Գեղամ Նազարյանն Armenia Today-ին հայտնել էին, որ չեն մասնակցի այս գործընթացին։
«Հայաստան» դաշինքն առաջարկել էր իմփիչմենթի համար փողոցային ճնշում ապահովել։ Նախաձեռնության համահեղինակ Նարեկ Մալյանը տեղեկացրել էր, որ «Պատիվ ունեմ» խմբակցությունն առանց որևէ նախապայմանի իր 6 ստորագրությամբ կմասնակցի Փաշինյանի իմփիչմենթի գործընթացին։
