Վայոց ձորի մարզի Արենի համայնքում քաղաքացին տան պայմաններում բեզոարյան այծ է պահել, հայտնել է Բնապահպանության և ընդերքի տեսչական մարմինը։
Ըստ հայտարարության՝ Աղավնաձոր բնակավայրի բնակիչ Վ.Օ.-ն դաշտից հայտնաբերած բեզոարյան այծի 1 առանձնյակ է տարել տուն՝ կենդանական աշխարհին պատճառելով 15 միլիոն դրամի վնաս։
Հաղորդագրության համաձայն՝ ապօրինի ձեռք բերված կենդանին առգրավվել և տեղափոխվել է ՀՀ գիտությունների ազգային ակադեմիայի կենդանաբանության և հիդրոէկոլոգիայի ազգային կենտրոն։
Այս հազվագյուտ տեսակը գրանցված էր նախկին ԽՍՀՄ-ի Կարմիր գրքում և ԲՊՄՄ Կարմիր ցուցակի չափորոշիչներով գնահատվում է որպես խոցելի տեսակ։
ՀՀ-ում Բեզոարյան այծեր պահպանվել են Խուստուփ լեռան վրա, Որոտանի կիրճում, Արփայի հովտի վերին մասում: Հայաստանում տեսակը հիմնականում պահպանվում է «Խոսրովի անտառ» և «Շիկահող» արգելոցներում, «Արևիք» և «Սևան» ազգային պարկերում, «Զանգեզուր» արգելավայրում և հարավային Հայաստանի մի շարք արգելավայրերում:
Փամբակի լեռնաշղթայում և Արագածի վրա տեսակն ամբողջովին անհետացել է:
