Վարչապետ Նիկոլ Փաշինյանը մանրամասնել է Երևանի և Բաքվի միջև խաղաղության պայմանագրի երկու կետերի բովանդակությունը, որոնց համաձայնել է Հայաստանը և որը նշանավորում է փաստաթղթի տեքստի շուրջ բանակցությունների ավարտ։ Այս մասին Փաշինյանը խոսել է ճեպազրույցի ժամանակ։
Նա հաստատել է, որ հարցը վերաբերում է հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։
ՀՀ վարչապետը պարզաբանել է, որ խաղաղության համաձայնագրի նախագծի երկու համաձայնեցված կետերը կյանքի կկոչվեն փաստաթղթի ուժի մեջ մտնելուց հետո։
«Չնայած ընդհանուր տրամաբանությունն այն է, որ մենք հիմա պետք է այդ հարցերով որոշ նյուանսերի հետ կապված քննարկումներ ունենանք։ Երկու հոդվածներից մեկը վերաբերում է սահմանի երկայնքով երրորդ երկրների ուժեր չտեղակայելու վերաբերյալ հարցին, մյուսը՝ միջազգային ատյաններից փոխադարձաբար հայցերը ետ վերադարձնելուն և միմյանց նկատմամբ գործողություններ չիրականացնելուն»,- նշել է Փաշինյանը։
Նա հավելել է, որ հայկական կողմը որոշել է համաձայնության գալ այս դրույթների շուրջ այն բանից հետո, երբ «ակնհայտ էր դարձել, որ չի հաջողվում և կարծես թե չի հաջողվելու ունենալ այդ առումով իդեալական ձևակերպումներ»։
«Մենք նաև Անվտանգության խորհրդի ֆորմատով ենք քննարկել և եկել ենք այն եզրակացության, որ այս պահին առկա բովանդակությունը կարող է համարվել այն փոխզիջումային տարբերակը, որը կարող է ընդունելի լինել և, ըստ էության, այս հանգամանքերում ընդունելի է ՀՀ-ի համար»,- ասել է նա։
Մեկնաբանելով հայ ռազմագերիների վերադարձի հարցը՝ Փաշինյանը հավելել է, որ «եթե հարցը չի լուծվել, նշանակում է՝ համաձայնություն չկա»։
«Դա ոչ թե նշանակում է, որ ՀՀ-ն չի բարձրացնում հարցը, այլ նշանակում է, որ չկա համաձայնություն, ըմբռնում»,- ասել է նա։
Փաշինյանն ընդգծել է, որ խաղաղության պայմանագրում չկա միակողմանի դրույթ, այսինքն՝ չկա մի դրույթ, որը վերաբերում է Հայաստանին և չի վերաբերում Ադրբեջանին։ Նաև, ըստ նրա, պայմանագրի նախագիծը պարունակում է դրույթ, որ երկու երկրներում «խաղաղության տրամաբանությանը հակասող գործողություններ պետք է տեղի չունենան»։
Մեկնաբանելով Ադրբեջանին Հայաստանի տարածքով միջանցք տրամադրելու հնարավորությունը՝ Փաշինյանը հայտարարել է, որ «այո՛, ճանապարհ ենք տալու»։ Վարչապետը պարզաբանել է, որ իր վերջին հոդվածում մանրամասն ձևակերպված է այն հարցը, թե ինչպես է տրամադրվելու ճանապարհը։
Նա հավելել է, որ Երևանն սպասում է Բաքվի պաշտոնական պատասխանին ճանապարհի վերաբերյալ առաջարկին։
Պատասխանելով հարցին, թե ե՞րբ կհրապարակվի խաղաղության պայմանագրի տեքստը, Փաշինյանը հայտարարել է, որ անհրաժեշտ է դիտարկել առկա պրակտիկան։ Նրա խոսքով՝ իշխանությունները փաստաթղթի տեքստի հետ կապված գաղտնիքներ չունեն հասարակությունից և, ըստ էության, նախկինում առանձին հոդվածներ են հրապարակվել։
«Չեմ կարծում, որ կարելի է ասել, որ հանրությունը ծանոթ չէ [փաստաթղթի] բովանդակությանը»,- նշել է նա։
Այսօր ավելի վաղ Ադրբեջանի արտգործնախարար Ջեյհուն Բայրամովը հայտարարել էր, որ Երևանի և Բաքվի միջև խաղաղության պայմանագրի տեքստի շուրջ բանակցությունների գործընթացն արդեն ավարտված է։ Նրա խոսքով՝ հայկական կողմը հայտնել է, որ ընդունել է վերջին երկու կետերը, որոնք բաց են մնում։ Հայաստանի ԱԳՆ-ն հաստատել էր նախագծի հաստատման ավարտը և հայտարարել, որ Երևանը պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և տեղի շուրջ։
