Մերձմոսկովյան շրջանի վրա ուկրաինական անօդաչու թռչող սարքի հարձակման հետևանքով զոհերի թիվը հասել է երեքի, հայտնել է РБК-ն։
«Հենց նոր տեղեկացա, որ երրորդ տղամարդն էլ է մահացել։ Բժիշկներն արեցին այն ամենը, ինչ կարող էին»,- Telegram ալիքում գրել է «Դոմոդեդովո»-ի ղեկավար Եվգենյա Խրուստալևան։
Մոսկվայի շրջանի ղեկավար Անդրեյ Վորոբյովը պարզաբանել է, որ երեք զոհերն էլ աշխատել էին «Միրատորգ»-ում։ Նրա խոսքով՝ երրորդ տղամարդը 43 տարեկան էր, ստացել էր ստամոքսի, ուսի կոտրվածք, ոտքի վնասվածք։
ՌԴ հակաօդային պաշտպանության ուժերը գիշերը ռուսական տարածքի վրա ոչնչացրել էին ուկրաինական 337 անօդաչու թռչող սարք։ Հարձակման հետևանքով ժամանակավորապես դադարեցվել էին Մոսկվայի «Դոմոդեդովո», «Շերեմետևո», «Վնուկովո» և «Ժուկովսկի» օդանավակայանների, ինչպես նաև Նիժնի Նովգորոդի և Յարոսլավլի օդանավակայանների չվերթերը։
Դեպքի առթիվ Քննչական կոմիտեն քրեական գործ էր հարուցել։ Գերատեսչության մամուլի ծառայությունը հայտնել էր, որ քննիչներն ու փորձագետները կուսումնասիրեն անօդաչու թռչող սարքերի տեսակները, պայթուցիկ սարքերը, կգնահատեն պատճառված վնասը։ Հոդվածի 3-րդ մասի «բ» կետով դեպքը որակվել է որպես ահաբեկչական գործողություն։ ՌԴ Քրեական օրենսգրքի 205 հոդվածով առավելագույն պատիժը ցմահ ազատազրկումն է:
Հարձակումը համընկել էր Սաուդյան Արաբիայում ուկրաինական և ամերիկյան պատվիրակությունների միջև բանակցությունների օրվա հետ։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ վերածվել էր վիճաբանության՝ հենց լրատվամիջոցների առջև, և գործարքը ձախողվել էր:
