Անհայտ կորածների հարցով միջազգային հանձնաժողովը Երևանին և Բաքվին առաջարկել է անհայտ կորածների հարցով Հայաստանի և Ադրբեջանի միջև ԴՆԹ համեմատության անկախ մեխանիզմ ներդնել, հայտնում է «Արմենպրես»-ը՝ հղում անելով Անհայտ կորածների հարցերով միջազգային հանձնաժողովի՝ Հայաստանի և Ադրբեջանի վերաբերյալ զեկույցներին։
Անհայտ կորածների հարցերով միջազգային հանձնաժողովը Բաքվում ներկայացրել է իր զեկույցը, որտեղ նշվում է, որ և՛ Հայաստանում, և՛ Ադրբեջանում կան առաջին և երկրորդ պատերազմների ժամանակ անհայտ կորածներ, իսկ ռազմական գործողությունների տարածքում հայտնաբերված մասունքները կարող են պատկանել երկու կողմերին էլ։
Ըստ զեկույցի՝ մեխանիզմի ներդրումը նույնականացումը հաստատելու արդյունավետ միջոցներից մեկը կարող է դառնալ։
«Այս մեխանիզմը, բացի երկու ժողովուրդների ընտանիքների համար իրենց հարցերին պատասխաններ ստանալու հնարավորությունից, կնպաստի նաև համագործակցությանն ու հաշտեցմանը։ Դա հնարավորություն կտա ցուցադրել հավաքական հավատարմությունն անհայտ կորած անձանց որոնման խնդրի լուծմանը, ինչը դուրս է ազգային սահմաններից»,- ասվում է զեկույցում։
2023 թվականի հոկտեբերի 27-ին Armenia Today-ի հարցմանն ի պատասխան՝ ՀՀ քննչական կոմիտեն հայտնել էր, որ 1992-2023 թվականներին Արցախի և Հայաստանի դեմ Ադրբեջանի ձեռնարկած ռազմական գործողությունների հետևանքով անհետ կորածների թիվը կազմում է 1016 մարդ։
2023-ի սեպտեմբերի 19-ին Արցախի նկատմամբ Ադրբեջանի ռազմական ագրեսիայի հետևանքով զոհվել էր 223, վիրավորվել՝ 244 մարդ, գերեվարվել են 17-ը, անհետ կորել՝ 20-ը, իսկ 100 632 քաղաքացի բռնի տեղահանվել էր ՀՀ։ 2024 թվականի հունվարի 5-ին Քննչական կոմիտեն հրապարակել էր 2023 թվականի սեպտեմբերին ադրբեջանական հարձակման հետևանքով Լեռնային Ղարաբաղում զոհվածների թիվը։ Ադրբեջանը հաստատել էր, որ 23 հայ գերի կա։
Փետրվարի 7-ին Հայաստանն ու Ադրբեջանը սահմանին հանդիպում էին անցկացրել՝ քննարկելու անհետ կորածների ճակատագիրը և պայմանավորվել էին, որ քննարկումները կշարունակվեն փոխադարձ համաձայնությամբ։
