Գյումրու նախկին քաղաքապետ Սամվել Բալասանյանն արձագանքել է մարտի 9-ին Գյումրիում վարչապետ Նիկոլ Փաշինյանի հայտարարություններին։
«Առողջությանս հետ կապված և իմ ընտանիքին բաժին հասած փորձությունների բերումով՝ երկար ժամանակ չեմ անդրադարձել տվյալ անձի հայտարարություններին, սակայն համբերությանս բաժակը լցվել է»,- ասել է Բալասանյանը։
Փաշինյանը հայտարարել էր, որ Գյումրու ավագանիում ճգնաժամ է առաջացել։ Նրա խոսքով՝ օրենսդրական փոփոխությունների և նոր ինստիտուտների ներդրման արդյունքում թալանված գույքը պետք է վերադարձվի Գյումրիին և մյուս համայնքներին։ Փաշինյանն օրինակ էր բերել Գյումրու խորհրդանիշը՝ «Սև բերդը», որը, ըստ վարչապետի, ապօրինի սեփականաշնորհվել է և պետք է վերադարձվի համայնքին։
«Հայաստանի գլխավոր դատախազությունն օրենքով սահմանված կարգով դիմել է Գյումրու ավագանուն, որպեսզի ավագանին դիմի դատարան՝ համայնքին գույքը վերադարձնելու համար»,- պարզաբանել էր Փաշինյանը։
Գյումրու նախկին քաղաքապետ Բալասանյանը ԶԼՄ-ում հրապարակած իր հայտարարության մեջ ասել է, որ վարչապետը «տեղյակ էլ չէ, որ շինծու քրեական գործը վերաբերում է ոչ թե «Սև Բերդ» ամրոցին, այլ հարակից տարածքներին»։
«Բոլոր գյումրեցիները գիտեն, թե ինչ վիճակում է գտնվել «Սև Բերդ» ամրոցը մասնավոր անձից իմ գնելուց առաջ, նորից եմ կրկնում՝ մասնավոր անձից, և ինչ է դարձել հիմա: Մշակութային, մարզական, պետական մակարդակի ինչ միջոցառումներ են տեղի ունեցել «Սև բերդ»-ում՝ բացարձակապես անվճար, մինչ օրս քաղաքի տուրիստական զարդն է՝ նորից անվճար»,- ընդգծել է Բալասանյանը։
Նախկին պաշտոնյայի խոսքով՝ վարչապետի քաղաքական թիմը 10 տոկոս էլ չի արել Գյումրիում զբոսաշրջությունը զարգացնելու համար՝ համեմատած հարյուր հազարավոր այցելուների։
«Ինչ վերաբերում է «Սև Բերդ»-ի ապօրինի լինելուն, խորհուրդ եմ տալիս նախքան մեղադրելը, անմեղության կանխավարկած խախտելը, քո ելույթով պետական ողջ գործիքակազմն իմ ընտանիքի դեմ տրամադրելը՝ ստանալ ճիշտ տեղեկություններ։ «Սև Բերդ» ամրոցը մեր ընտանիքը ձեռք է բերել նախկին սեփականատիրոջից, այլ ոչ թե համայնքից: Այնպես որ, «Սև Բերդ»-ը չի կարող դառնալ քո սիրելի հատիկառհատիկի կոնտենտ և հայտնվել Ռենջ Ռովերի կողքին: Մարդկային, բարոյական բոլոր սահմաններն անցած անձին խորհուրդ եմ տալիս հեռու մնալ ինձանից և իմ ընտանիքից»,- ընդգծել է Բալասանյանը։
Նա խոստացել է իր առողջական խնդիրները լուծելուց հետո «իրեն առաջադրված բոլոր մեղադրանքներին իրավական և քաղաքական պատասխան տալ» և ասել, որ շուտով ակնհայտ կդառնա, որ որդու՝ Խաչատուր Բալասանյանի գործով դատավարությունն իրավական ֆարս է։
«Այս մարդը խոսել է «վերջին ճակատամարտի» մասին, ես կասեմ, որ «վերջին ճակատամարտը» պետք է տրվեր մեկ այլ տեղ, այլ ոչ թե Գյումրիում՝ «Սև Բերդի» մոտ»,- ասվում է Բալասանյանի հայտարարության մեջ։
Նա գյումրեցիներին կոչ է արեց ակտիվորեն մասնակցել Գյումրու ավագանու արտահերթ ընտրություններին` մերժելով ազգը «սևերի ու սպիտակների» բաժանած խմբին («Քաղաքացիական պայմանագիր կուսակցություն» - խմբ․)։
2024 թվականի հոկտեմբեր 16-ին Գյումրու նախկին քաղաքապետի նկատմամբ հանրային քրեական հետապնդում էր հարուցվել «Սև Բերդ» պատմամշակութային ամրոցի հարակից հողերը «հանցավոր ճանապարհով օտարելու համար»։ Նույն գործով մեղադրյալ էր նաև նախկին քաղաքապետի կրտսեր որդին: Հակակոռուպցիոն վերաքննիչ քրեական դատարանը Գյումրու նախկին քաղաքապետի որդու՝ Խաչատուր Բալասանյանի խափանման միջոցը հունվարին փոխել էր՝ 80 միլիոն դրամ գրավի կիրառմամբ երկրորդ անգամ տնային կալանքի ենթարկելով։
Բալասանյանը Գյումրի համայնքի ղեկավարի պաշտոնն զբաղեցրել էր 2012-2021 թվականներին: 2021 թվականի նոյեմբերին քաղաքապետ էր դարձել Վարդգես Սամսոնյանը, ում թեկնածությունը պաշտպանել էին «Բալասանյան դաշինք» և «Քաղաքացիական պայմանագիր» խմբակցությունները:
