Հայաստանի իշխանությունը լռությամբ տանում է Ադրբեջանի բոլոր պահանջները, հայտարարել են ՀՀ արտաքին գործերի նախարարության դիմաց բողոքի ակցիա իրականացնող քաղաքացիները՝ գերատեսչությանը կոչ անելով հրավիրել Հայաստանում հավատարմագրված դիվանագետներին, ներկայացնել Բաքվում հայերի նկատմամբ ապօրինի գործողությունների փաստերը և նրանց ազատ արձակելու կոնկրետ քայլեր ձեռնարկել։
Մասնակիցները պաստառներ են պարզել՝ «Հայ ռազմագերիները քո լռության պատանդն են, Փաշինյան», «Ազատություն Ռուբենին և բոլոր գերիներին» գրառումներով։
Ակցիա իրականացնող քաղաքացիները նաև «անատամ» են անվանել հայերի նկատմամբ խոշտանգումների վերաբերյալ «խորը մտահոգության մասին» ԱԳՆ-ի հայտարարությունը, որը պարզապես խորհուրդ է տվել Ադրբեջանին դադարեցնել ատելություն հրահրելը։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին Բաքվում սկսվել էին Լեռնային Ղարաբաղի ութ քաղաքական և ռազմական առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
Փետրվարի 19-ին նախկին պետնախարարը հացադուլ էր հայտարարել և դիմել աշխարհի առաջնորդներին, միջազգային կազմակերպություններին և իրավապաշտպաններին՝ ուշադրություն դարձնել Բաքվում տեղի ունեցող անօրինական գործընթացներին։ Փետրվարի 25-ին ադրբեջանական լրատվամիջոցները հայտնել էին, որ «գործով» հաջորդ նիստում Վարդանյանն ասել է, որ հացադուլի պատճառով իրեն վատ է զգում, որից հետո դատավորը բուժզննման համար ընդմիջում էր հայտարարել։
Փետրվարի 26-ին Վարդանյանի փաստաբան Ջարեդ Գենսերը հայտնել էր նրա առողջական վիճակի կտրուկ վատթարացման մասին։ Փետրվարի 27-ին նրա որդին՝ Դավիթ Վարդանյանը, միջազգային հանրությանը, աշխարհասփյուռ հայությանը կոչ էր արել քայլեր ձեռնարկել Բաքվի դեմ։
Փետրվարի 21-ին ընդդիմադիր «Հայաստան» խմբակցության պատգամավոր Լիլիթ Գալստյանը Եվրոպայի անվտանգության և համագործակցության կազմակերպությանն (ԵԱՀԿ) առաջարկել էր մոնիթորինգային խումբ ուղարկել Բաքու՝ հայ գերիների և Արցախի ռազմաքաղաքական ղեկավարության նկատմամբ տեղի ունեցող ապօրինի դատավարությունը դիտարկելու նպատակով։
