Երևանի նախկին քաղաքապետ Հայկ Մարությանը մայրաքաղաքի բնակիչներին կոչ է արել փետրվարի 1-ից բոյկոտել հասարակական տրանսպորտի նոր սակագները՝ չնայած իշխանությունների զիջումներին։
Նրա խոսքով՝ ժողովրդի ճնշման ներքո իշխանությունները հետքայլ են արել։ Նա հիշեցրել է, որ ի սկզբանե հայտարարել էին մեկ ուղևորության համար 300 դրամ սակագնի մասին։
Այսօր ավելի վաղ Երևանի քաղաքապետ Տիգրան Ավինյանը հայտարարել էր, որ Երևանի քաղաքապետարանը որոշել է փետրվարի 1-ից հասարակական տրանսպորտով մեկ ուղևորության համար նոր սակագին սահմանել՝ 150 դրամ։
Մարությանը շեշտել է, որ շարունակելու են պահանջել մեկ ուղևորության համար 100 դրամ սակագին սահմանել։
«Հիմա հայտարարում են 150 դրամ, սա նշանակում է, որ իրենք բացարձակ ոչ մի հաշվարկ չունեն, ոչ մի թիվ չկա դրված նրանց յուրաքանչյուր որոշման տակ։ Ժողովրդի պահանջն էր մեկ ուղևորության համար 100 դրամ և այս պահանջը մնում է ուժի մեջ, բոյկոտը նույնպես մնում է ուժի մեջ, փետրվարի 1-ից միասնական բոյկոտում ենք»,- հավելել է նա։
«Մայր Հայաստան» դաշինքի առաջնորդ Անդրանիկ Թևանյանը տրանսպորտի գնի վերաբերյալ իշխանության քաղաքականությունը «թուրքական բազար» է որակել և կոչ արել շարունակել ճնշումը։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը, որն սկսել էր գործել 2025 թվականի հունվարի 1-ից և նախատեսում էր տրանսպորտի թանկացում։
2024 թվականի դեկտեմբերի 20-ին քաղաքապետարանը հետաձգել էր համակարգի ներդրումը մինչև փետրվարի 1-ը։ Հունվարի 19-ին Մարությանը և Թևանյանը երևանցիներին կոչ էին արել բոյկոտել փետրվարի 1-ից մայրաքաղաքում տրանսպորտի սակագինը բարձրացնելու իշխանությունների ծրագրերը և ստորագրահավաքներ նախաձեռնել տրանսպորտի ուղեվարձի թանկացման դեմ։ Մարությանի թիմը հայտնել էր 76 հազար ստորագրություն հավաքելու մասին և կոչ արել փետրվարի 1-ից, ի նշան բողոքի, հասարակական տրանսպորտից օգտվելու դեպքում վճարել 100 դրամ։
