«Հանրային» հ/ը-ի եթերում ՊՆ նախարար Սուրեն Պապիկյանն անդրադարձել է բանակի բարեփոխումների նոր պլաններին։
«Առաջինը ռազմաուսումնական հաստատությունների ձևի և բովանդակության փոփոխությունն է։ Մեր երկրորդ քայլը պետք է լինի անցումը դեպի պրոֆեսիոնալ բանակին, որը մեկ օրվա անելիք չէ։ Այդ ուղղությամբ քայլեր արվում են, ամեն ինչ պետք է լինի օրգանական։ Պետք է ժամկետային զինծառայությունից անցնենք պայմանագրային ծառայության։ Մենք պետք է պայմանագրայիններին վերցնենք «զրոյից»։ Գործող պայմանագրայինների համար ստեղծելու ենք ատեստավորման հնարավորություն»,-հայտարարեց Պապիկյանը։
ՊՆ նախարարը ձեռնպահ մնաց սպառազինության գնումների մասին տեղեկություններ հաղորդելուց։ «Դրանք գաղտնի գործընթացներ են, կան բանակցություններ, որոնց մասին խոսել չի կարելի»,-նշեց Պապիկյանը։
Ինչ վերաբերում է ԳՇ պետի մինչ այժմ չնշանակվելուն, Պապիկյանը նշեց, որ ՊՆ-ում կառուցվածքային փոփոխություններ են նախատեսվում։ «Ունենալու ենք նոր մոդել, որտեղ ԳՇ պետը լինելու է ՊՆ նախարարի առաջին տեղակալը»,-նշեց նա։
Նախարարը հայտնեց, որ դիրքերի ամրացման հարցում ամենօրյա աշխատանք է իրականացվում։ «Կառուցում ենք ճանապարհներ, կահավորվում և ինժեներական աշխատանքներ են իրականցնում սահմանագծում։ Մինչ տարեվերջ խնդիրներ չենք ունենա այս հարցում»,-նշեց Պապիկյանը։
