«Ուժեղ Հայաստան» դաշինքի ցուցակի առաջին համար Նարեկ Կարապետյանը Էստոնիայի և Վրաստանի տնտեսական զարգացման մոտեցումները համեմատել է Հայաստանի իշխանությունների վարած քաղաքականության հետ։
Նա նշել է, որ Էստոնիան կառուցում է Rail Baltica երկաթուղին և e-Estonia հարթակի միջոցով նվազեցնում պետական վերահսկողությունը բիզնեսի նկատմամբ՝ նպատակ դնելով ութ տարում կրկնապատկել երկրի տնտեսությունը։ Կարապետյանի խոսքով՝ Վրաստանն էլ կառուցում է Անակլիայի նոր խորջրյա նավահանգիստը, ինչպես նաև թվայնացնում ու պարզեցնում է պետական կառավարման համակարգը։
Մինչդեռ Հայաստանի իշխանությունները, նրա խոսքով, խոշոր ենթակառուցվածքային և տնտեսական նախագծեր իրականացնելու փոխարեն կենտրոնացած են գործարարներից գույքի բռնագրավման վրա։ «Հայաստանի կառավարությունը բիզնեսմենից խլել է սպորտզալ և քննարկում է նրա ընկերոջ քաբաբանոցի ազգայնացման հարցը»,- հայտարարել է Կարապետյանը։
Հուլիսի 6-ի առավոտյան «Բարգավաճ Հայաստան» կուսակցության առաջնորդ Գագիկ Ծառուկյանի տանը, ինչպես նաև նրա հետ կապվող ավելի քան 70 ընկերությունում իրականացված խուզարկություններից հետո նրան ձերբակալել էին։ Հուլիսի 7-ին դատարանը կալանավորել էր քաղաքական գործչին։
Ծառուկյանի ձերբակալությանը զուգահեռ, իշխանությունները հուլիսի 6-ին սկսել էին նրա ընկերություններում ստուգումները: Հուլիսի 16-ին նրան պատկանող «Արարարատցեմենտ» ընկերությունն անցել էր պետության կառավարմանը: Նույն օրը Երևանի քաղաքապետ Տիգրան Ավինյանը հայտարարել էր, որ «Մուլտի Ուելնես» մարզահամալիրի շենքը փոխանցվել է քաղաքապետարանին: Իրավապահ մարմինները նաև կապարակնքել էին «Մուլտի Սթոուն» և «Մուլտի Տաբակ» բիզնեսները, «Մուլտի Գրանդ» և «Մուլտի Ռեստ Հաուս» հյուրանոցները, ինչպես նաև Երևանի «Արարատ» գինու-կոնյակի-օղու գործարանը: Ծառուկյանն իր հետ կապվող ձեռնարկությունների գործունեության կասեցումը որակել էր որպես իր վրա ճնշում:
