Հանգուցյալ սենատոր Լինդսի Գրեմի մշակած օրինագիծը միջոցներ է նախատեսում ռուսական նավթի և գազի հինգ խոշորագույն գնորդների, առաջին հերթին՝ Չինաստանի և Հնդկաստանի դեմ, հայտնել է The Wall Street Journal-ը՝ հղում անելով իրավիճակին ծանոթ աղբյուրներին։
Պարբերականի զրուցակիցների փոխանցմամբ՝ Թրամփը կարող է մինչև 100% մաքսատուրքեր սահմանել այն առանձին պետությունների և մասնավոր անձանց նկատմամբ, որոնք աջակցում են էներգակիրների վաճառքին։ Բացի այդ, օրինագիծը ներառում է դրույթներ ռուսական պաշտպանական, էներգետիկ և ֆինանսական օբյեկտների, ինչպես նաև ստվերային նավատորմի դեմ պատժամիջոցների մասին։
Թերթի հարցրած վերլուծաբանները նշում են, որ նախագծի ընդունման դեպքում սա կլինի առաջին դեպքը, երբ ԱՄՆ Կոնգրեսը թույլատրում է մաքսատուրքերն օգտագործել որպես աշխարհաքաղաքական զենք. նախկինում դրանք կիրառվում էին որպես անազնիվ առևտրային գործելակերպի դեմ պայքարի գործիք։
«Մենք ժամանակի ընթացքում լրամշակել ենք այն ԱՄՆ առևտրային ներկայացուցչի, ինչպես նաև Սպիտակ տան գործընկերների հետ բանակցություններում։ Դա շատ բարդ, մանրակրկիտ և երկարատև գործընթաց էր։ Մենք չենք ցանկանում չափազանց լայն ու կոպիտ մոտեցում ցուցաբերել»,- լրագրողներին հայտնել է դեմոկրատ սենատոր Ռիչարդ Բլյումենթալը, ով Գրեմի հետ համատեղ աշխատել է օրինագծի վրա։
Երկու կուսակցությունների սենատորներն ու Սպիտակ տունն ավելի քան մեկ տարի լրամշակել են օրինագիծը, որն ի սկզբանե նախատեսում էր 500-տոկոսանոց մաքսատուրքերի սահմանում ռուսական նավթ, գազ, ուրան և այլ արտադրանք գնող ցանկացած երկրից ներմուծվող ապրանքների համար։ Սակայն Սպիտակ տունը չէր ցանկանում, որ Կոնգրեսը սահմաներ նման պատժամիջոցներ՝ ձգտելով Թրամփին առավելագույն ճկունություն տրամադրել Ուկրաինայում հակամարտության դադարեցման շուրջ բանակցելու ջանքերում, նշում է WSJ-ն։
Աղբյուրները հայտնել են, որ ներկայիս տարբերակը փոխզիջումային է, որն արժանացել է հանրապետականների, դեմոկրատների և Սպիտակ տան աջակցությանը։ Ընթացիկ նախագիծը նաև ապահովում է Թրամփի աջակցությունը Գերագույն դատարանի հետ հնարավոր հակադրության դեպքում, որն այս տարի արդեն մերժել էր միակողմանի մաքսատուրքերի համար նախագահի կողմից արտակարգ դրության կիրառումը։
Թրամփի թիմը պնդում է, որ նախագահն աջակցում է օրինագծին, որն իրենք ցանկանում են ընդունել ի հիշատակ Գրեմի։ Վերջինս մահացել է հուլիսի 11-ին՝ 71 տարեկան հասակում։
Հուլիսի 14-ին ամերիկյան առաջնորդը հայտարարել է, որ Գրեմի նախագծի ընդունման «լավ շանսեր» կան՝ նշելով, որ նա շատ էր ցանկանում դա։ Թրամփը չի բացառել, որ դրանում կարող են ներառվել նաև Իրանն ու «Հեզբոլլահը», սակայն հայտնել է, որ Չինաստանի և Հնդկաստանի դեմ երկրորդային պատժամիջոցների սահմանումը չի քննարկվել։
Կրեմլն իր հերթին հայտարարել էր, որ ռուսական տնտեսությունը շարունակում է գործել «ահռելի քանակությամբ պատժամիջոցների» ներքո և դրանց դեմ «որոշակի իմունիտետ» է ձևավորել։
Ավելի լայն տարածաշրջանային հակամարտության ֆոնին մարտի 2-ին՝ «Հեզբոլլահ»-ն ու Իսրայելը վերսկսել էին պատերազմը։ Հունիսի 26-ին Իսրայելը և Լիբանանը, ԱՄՆ միջնորդությամբ, ստորագրել էին հակամարտության փուլային կարգավորման շրջանակային համաձայնագիր, որը նախատեսում էր իսրայելական զորքերի մասնակի դուրսբերում Լիբանանի տարածքից։ Իսրայելի վարչապետ Բենիամին Նեթանյահուն հայտարարել էր, որ առաջին փուլում Իսրայելը դուրս կգա Լիբանանի հարավում գտնվող երկու տարածքից՝ Լիտանի գետից հյուսիս և հարավ։ «Հեզբոլլահի» առաջնորդ Նաիմ Քասեմը մերժել էր համաձայնագիրը և փաստաթուղթն անվանել «կապիտուլյացիա»։
