«Բարգավաճ Հայաստան» կուսակցության առաջնորդ Գագիկ Ծառուկյանին պատկանող ձեռնարկությունների աշխատակիցները երկրորդ օրն անընդմեջ բողոքի ակցիաներ են անցկացնում՝ պահանջելով հանել կնիքները և վերսկսել գործարանների աշխատանքը։
Նախորդ օրը` հուլիսի 13-ին, բողոքի ակցիայի էին դուրս եկել «Մուլտի Սթոուն», «Մուլտի Ռեստ Հաուս» հյուրանոցի և Երևանի «Արարատ» կոնյակի, գինու և օղու կոմբինատի աշխատակիցները, այսօր՝ հուլիսի 14-ին, ակցիա են իրականացրել «Մուլտի Տաբակ» ընկերության աշխատակիցները։
Նրանք պահանջել են հանել ձեռնարկությունների կապարակնիքները և թույլատրել շարունակել աշխատանքը՝ ընդգծելով, որ քննչական գործողություններն ու ստուգումները կարելի է իրականացնել առանց արտադրությունը կանգնեցնելու և մարդկանց աշխատանքից զրկելու։
Ակցիայի մասնակիցները հայտարարել են, որ մտադիր են շարունակել բողոքի գործողությունները մինչև արտադրության վերագործարկումը։ «Մուլտի Տաբակի» աշխատակիցների ակցիայի ուղիղ հեռարձակումն՝ Armenia Today-ի Youtube-ի ալիքում։
Ընկերության աշխատակիցների խոսքով՝ իշխանությունների գործողությունների հետևանքով անորոշության մեջ են հայտնվել ոչ միայն ընդդիմադիր գործիչը, այլև նրա տարբեր ձեռնարկությունների շուրջ 10 000 աշխատակից։ Նրանք հայտարարել են, որ պատրաստ են աշխատանքը շարունակել նաև ստուգումների ընթացքում։
Աշխատակիցները նշել են, որ Իրանում պատերազմական իրավիճակի և շուկայական այլ խնդիրների պատճառով արդեն երեք ամիս հարկադիր պարապուրդի մեջ էին, սակայն այդ ընթացքում ամեն ամիս աշխատավարձ են ստացել։ Նրանց խոսքով՝ ղեկավարությունը չի կրճատել անձնակազմը և ամեն ամիս վճարել է աշխատավարձերը։
Ընկերության գլխավոր հաշվապահի խոսքով՝ այդ ընթացքում աշխատավարձերն ու հարկերը վճարվել են Ծառուկյանի տրամադրած փոխառությունների հաշվին։ Նա պնդել է, որ կազմակերպությունը գործել է օրենքի շրջանակում, իսկ արտադրամասի փակումը կարող է հանգեցնել խոշոր տնտեսական վնասների։
Աշխատակիցները նշել են, որ արտադրամասում պահվում են միլիարդավոր դրամների հումք և պատրաստի արտադրանք, որոնց պահպանման համար անհրաժեշտ են հատուկ ջերմաստիճանային և խոնավության պայմաններ։ Նրա պնդմամբ՝ կաթսայատան աշխատանքի դադարեցումը վտանգում է այդ արտադրանքի պահպանությունը։
Բողոքի ակցիայի մասնակիցները հայտարարել են, որ չեն պահանջում որևէ արտոնություն, այլ ցանկանում են վերադառնալ աշխատանքի։
«Մենք ողորմություն չենք ուզում, պաշտոն չենք ուզում, պահանջում ենք, որ մեր գործարանը վերաբացվի, մենք աշխատենք», - հայտարարել է աշխատակիցներից մեկը։
Նրանցից մեկը նշել է, որ եթե գործարանը չվերաբացվի, իրենք պատրաստ են շարունակել պայքարը՝ իրենց աշխատատեղերը պաշտպանելու համար։
«Եթե գործարանը չբացեն, ամեն ինչի ընդունակ ենք։ Մեր երեխաներին ո՞վ է պահելու», - ասել է աշխատակիցներից մեկը։
Մեկ այլ աշխատակից էլ պնդել է, որ Ծառուկյանի նկատմամբ իրականացվող գործողությունների հետևանքով տուժում են նաև հազարավոր աշխատակիցներն ու նրանց ընտանիքները։
«Մենք մեր աշխատանքն ենք պահանջում։ Չենք գնալու ուրիշ տեղ աշխատելու, պայքարելու ենք մինչև վերջ, որ մեր աշխատատեղը վերաբացվի», - նշել է ակցիայի մասնակիցներից մեկը։
Ակցիայի մասնակիցները պնդել են, որ գործարանի փակմամբ հարված է հասցվել հազարավոր ընտանիքների սոցիալական վիճակին, որոնց եկամուտը կախված է ընկերության աշխատանքից։ Նրանք նշել են, որ գործարանն ունի մոտավորապես 130 աշխատակից։
Վարչապետ Նիկոլ Փաշինյանի և Ծառուկյանի միջև հեռակա բանավեճ էր սկսվել դեռ նախընտրական փուլում։ Փաշինյանը հայտարարել էր, որ «միլիարդատեր» քաղաքական գործիչները պետք է սնանկանան՝ նկատի ունենալով նաև Ծառուկյանին։ Փաշինյանն այդ փուլում հայտարարել էր նաև ԲՀԿ առաջնորդի հետ կապվող «Արարատցեմենտ» ընկերությունը պետության վերահսկողության տակ վերցնելու մասին, ինչից հետո ընկերությանն առնչվող վարույթներ էին նախաձեռնվել։
Ծառուկյանը ներգրավված է առանձնապես խոշոր չափերով հարկերից խուսափելու վարույթում, ինչի պատճառով արգելվել է նաև ելքը ՀՀ-ից։ Հուլիսի 6-ի առավոտյան Ծառուկյանի բնակարանում, ինչպես նաև ավելի քան 70 ընկերությունում խուզարկություններից հետո նրան ձերբակալել էին, հուլիսի 7-ին նրան կալանավորել էին։ Ծառուկյանի բազմաթիվ ընկերություններ շարունակում են կապարակնքված մնալ, ինչը առաջացրել է աշխատակիցների դժգոհությունը և բողոքի ակցիաների պատճառ դարձել։
Ծառուկյանին մեղադրում են նաև ապօրինի որսի մեջ, և այդ վարույթի շրջանակում նրա առաձնատնից առգրավվել էին կենդանիների խրտվիլակներ, ինչպես նաև 3 առյուծ և 1 վագր, առյուծներից մեկը քնեցումից չէր արթնացել։ Ծառուկյանն իրեն առաջադրված մեղադրանքներն անվանել է «սուտ» և «փուչիկ»։
Կարդացեք նաև՝
«Աշխատակիցները չպետք է տուժեն»․ Ծառուկյանի ձեռնարկություններում ակցիաներ են անցկացվել
