Թեհրանն արձագանքել է Հորմուզի նեղուցը վերահսկելու և նավարկության դիմաց 20% վճար գանձելու մասին ԱՄՆ նախագահ Դոնալդ Թրամփի հայտարարություններին։
Իրանի արտգործնախարար Աբբաս Արաղչին հայտարարել է, որ Թեհրանը միշտ վերահսկել է Հորմուզի նեղուցը և հետագայում ևս կշարունակի կառավարել այն։
Անդրադառնալով տարածաշրջանի անվտանգությունն ապահովելու դիմաց 20% վճար գանձելու մասին Թրամփի հայտարարությանը՝ Արաղչին այդ չափը չափազանց բարձր է անվանել՝ հավելելով, որ Իրանն «արդարացի կվարվի»։
Իրանի զինված ուժերի «Խաթամ ալ Անբիա» կենտրոնական շտաբի ներկայացուցիչ Էբրահիմ Զոլֆաղարին, իր հերթին, հայտարարել է, որ Պարսից ծոցի տարածաշրջանում իրավիճակի հնարավոր հետագա սրման պատասխանատվությունը կրելու են ԱՄՆ-ն և նրա հետ համագործակցող երկրները։
ԱՄՆ-ն և Իսրայելը Իրանի դեմ գործողություններ էին սկսել փետրվարի 28-ին, որից հետո Վաշինգտոնն ու Թեհրանը փոխըմբռնման հուշագիր էին ստորագրել։ Այն նախատեսում էր ռազմական գործողությունների դադարեցում, Հորմուզի նեղուցի վերաբացում, ինչպես նաև Իրանի միջուկային ծրագրի և ԱՄՆ պատժամիջոցների վերաբերյալ փոխադարձ պարտավորություններ։
Հունիսին Վաշինգտոնն ու Թեհրանն ստորագրել էին ռազմական գործողությունների անհապաղ դադարեցման հուշագիր։ Թրամփը հուլիս 8-ին հայտարարել էր, որ ԱՄՆ-ի և Իրանի միջև հրադադարն այլևս ուժի մեջ չէ, և որ Թեհրանի հետ հետագա բանակցություններն անիմաստ են։ ԱՄՆ-ն ու Իրանը հուլիսի 7-ից վերսկսել էին փոխադարձ հարվածները։ Իրանը հուլիսի 12-ին հայտնել էր, որ Հորմուզով անցումը կվերսկսվի միայն իրավիճակի կարգավորումից հետո։ Հուլիսի 13-ին Թրամփը հայտնել էր, որ ԱՄՆ-ն վերահսկողության տակ է վերցնում Հորմուզի նեղուցը։
