Պաշտոնական Բաքուն հայտարարել է, որ ավարտել է Հայաստանի հետ խաղաղության համաձայնագրի համաձայնեցման իր մասը՝ կրկին դրա ստորագրումը պայմանավորելով ՀՀ Սահմանադրության փոփոխությամբ։
Ադրբեջանի արտգործնախարար Ջեյհուն Բայրամովը կրկնել է Բաքվի պահանջը՝ նշելով, որ համաձայնագիրը կարող է ստորագրվել միայն այն բանից հետո, երբ Հայաստանի Սահմանադրությունից հանվեն, իր ձևակերպմամբ, Ադրբեջանի նկատմամբ «տարածքային պահանջները»։
Բայրամովը նաև նշել է, որ ԱՄՆ-ի և Հայաստանի միջև շարունակվում են բանակցությունները «Միջազգային խաղաղության և բարգավաճման համար Թրամփի ուղի» (TRIPP) ծրագրի շուրջ։
Ադրբեջանի ԱԳ նախարարը, սակայն, այն անվանել է ոչ թե TRIPP, այլ բանակցություն՝ Հայաստանի տարածքով անցնող, այցպես կոչված «Զանգեզուրի միջանցքի» ավտոմոբիլային և երկաթուղային հատվածների շուրջ։ Նրա խոսքով՝ Ադրբեջանին ԱՄՆ գործընկերները տեղեկացնում են, որ գործընթացը շարունակվում է, և ներկայումս ընթանում է անհրաժեշտ փաստաթղթերի նախապատրաստման փուլը։
2025-ի օգոստոսին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել Սյունիքով անցնող ճանապարհ, որն ապաշրջափակվելու է TRIPP ծրագրով։ Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
Ավելի ուշ ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որը Վաշինգտոնում նախաստորագրվել էր երկու երկրների արտգործնախարարների կողմից։ 2026-ի հունիսին ՀՀ-ն և ԱՄՆ-ն ստորագրել էին TRIPP-ի շրջանակային համաձայնագիրը։
Ադրբեջանի իշխանությունները բազմիցս հայտարարել են, որ խաղաղության պայմանագրի վերջնական ստորագրման նախապայման պետք է լինի Հայաստանի Սահմանադրության փոփոխությունը․ Բաքուն պահանջում է մայր օրենքից հանել հղումն Անկախության հռչակագրին։ ՀՀ վարչապետ Նիկոլ Փաշինյանը Հայաստանի անկախության հռչակագիրն անվանել էր «կոնֆլիկտային» դրույթ և նշել, որ Հայաստանի նոր Սահմանադրության ընդունման հանրաքվեն անհրաժեշտ է անցկացնել ԱԺ ընտրություններից հետո։
Կարդացեք նաև՝
ԱՄՆ միջանցքի նախագիծը Հայաստանին տալիս է ժամանակ, բայց ոչ երաշխիքներ․ Սուրեն Պարսյան
