Արևմտյան երկրների կողմից Հայաստանի շուրջ իրականացվող, ՀԱՊԿ-ի գնահատմամբ՝ ոչ բարեկամական ռազմական և քաղաքական քայլերը կարող են հանգեցնել տարածաշրջանում լարվածության հետագա աճի, հայտարարել է ՀԱՊԿ մշտական խորհրդի նախագահ Վիկտոր Վասիլևը Սանկտ Պետերբուրգի միջազգային իրավական ֆորումի շրջանակում, փոխանցում է ՏԱՍՍ-ը։
Նրա խոսքով՝ Հարավային Կովկասում իրավիճակը հատուկ ուշադրության է արժանի, այդ թվում՝ Հայաստանում անցկացված ընտրությունների համատեքստում։ Վասիլևը նշել է, որ ԱՄՆ-ի կողմից, այսպես կոչված, Զանգեզուրի միջանցքի անվտանգության ապահովման ծրագրերը, ինչպես նաև ԵՄ երկրների՝ Հայաստանն իրենց ռազմական կառույցներում ներգրավելու մտադրությունները և այլ նմանատիպ քայլեր, ըստ ՀԱՊԿ-ի գնահատականի, կարող են հանգեցնել տարածաշրջանում հետագա սրացման։
«Հարավային Կովկասում իրավիճակը հատուկ ուշադրության է արժանի, այդ թվում՝ Հայաստանում անցկացված ընտրությունների լույսի ներքո։ Մենք հետևում ենք իրավիճակին»,- ընդգծել է նա։
ՀԱՊԿ-ին Երևանի անդամակցության շարունակման հեռանկարները կդառնան կազմակերպության բարձրագույն ղեկավարության մանրակրկիտ քննարկման առարկա, հայտարարել է Վասիլևը և հավելել, որ Հայաստանի անդամակցության հարցը կստանա առավելագույն ուշադրություն և կքննարկվի բարձրագույն մակարդակով՝ կազմակերպության ներսում ընթացող գործընթացների համատեքստում։
ՀԱՊԿ-ում մասնակցությունը սառեցնելու մասին ՀՀ վարչապետ Նիկոլ Փաշինյանը հայտարարել էր 2024 թվականի ապրիլի 25-ին։ Կազմակերպության նկատմամբ վերաբերմունքը փոխելու պայման Փաշինյանը նշել էր Բելառուսի դուրս գալը ՀԱՊԿ-ից, ինչպես նաև Բելառուսի նախագահ Ալեքսանդր Լուկաշենկոյի ներողությունը՝ 2020 թվականի պատերազմի ընթացքում Բաքվին աջակցող խոսքերի համար։
ՌԴ նախագահ Վլադիմիր Պուտինը Հայաստանի ներկայիս վերաբերմունքը ՀԱՊԿ-ի նկատմամբ կապել էր Երևանի ներքաղաքական խնդիրների հետ և նշել, որ այս հարցում ոչ վերջին դերն է ունեցել Լեռնային Ղարաբաղի թեման։
ՌԴ արտգործնախարար Սերգեյ Լավրովը հունիսի 10-ին չէր բացառել Հայաստանի հեռացումը ՀԱՊԿ-ից՝ անդամավճարները չվճարելու պատճառով։ Փաշինյանը հունիսի 13-ին խորհրդարանում ասել էր, որ Երևանի հաջորդ «տրամաբանական քայլը» կլինի կազմակերպությունից դուրս գալը։
